مردان: سربراہ پاکستان تحریک انصاف پارلیمنٹیرینز پرویز خٹک کا کہنا ہے کہ میں مذاق نہیں کر رہا، میری حکومت آنے والی ہے، جتنی بھی حکومتیں گزری ہیں کیا انہوں نے کبھی عوام کی خدمت کی؟
پرویز خٹک نے اپنے ایک بیان میں کہا کہ ملک میں غریب کا کوئی پرسان حال نہیں، یہ فرق کون ختم کرے گا کہ غریب کا بچہ مزدور اور امیر کا بچہ افسر بنے گا؟ میں نے اپنے دور حکومت میں اسکولوں میں اساتذہ کی حاضری یقینی بنائی۔
انہوں نے کہا کہ جب میں وزیر اعلیٰ خیبر پختونخوا بنا تو اسپتالوں میں ڈاکٹرز کی حاضری یقینی بنائی، تھانے میں غریب پر بدمعاشی چلتی تھی میں نے یہ سب ختم کیا، اپنے دور میں تھانے میں غریب کو سہولیات فراہم کیں، ایوب خان کے دور میں پاکستان ترقی کر رہا تھا ملک پر قرضہ نہیں تھا۔
ان کا کہنا تھا کہ بدترین پالیسیوں کی وجہ سے ملک کو مقروض کیا گیا، اب قرض واپس کرتے ہیں تو پاکستان کے پیسے نہیں ہوتے کیونکہ آئی ایم ایف سخت شرائط پر قرضہ فراہم کرتا ہے، یہ تمام لیڈر قوم کے ہمدرد نہیں ان کے دشمن ہے۔
متعلقہ: وکیل نے بلّے کا نشان لینے کیلیے درخواست دی تو میں نے واپس لینے کو کہا، پرویز خٹک
پرویز خٹک نے کہا کہ قوم کے حقیقی مجرم کرپٹ سیاستدان ہیں، وزیر اعظم نے قرضے لیے لیکن ملک کو پاؤں پر کھڑا نہ کیا، عوام نے مجرمان کو نہ پہچانا تو مزید نقصان ہوگا۔
اڈیالہ جیل میں قید سابق وزیر اعظم پر تنقید کرتے ہوئے پرویز خٹک نے کہا کہ بانی پی ٹی آئی نے کہا نیا پاکستان بنائیں گے تو میں نے ان کا ساتھ دیا، میرے بغیر وہ خیبر پختونخوا میں حکومت نہیں بنا سکتے تھے، انہوں نے کہا میرے دور میں انصاف ہوگا، کہاں انصاف ہوا؟
’بانی پی ٹی آئی نے کہا قرضہ لیا تو خودکشی کر لوں گا۔ انہوں نے قرضہ لیا تو خودکشی کیوں نہیں کرتے؟ بانی پی ٹی آئی ملک کو ٹھیک نہیں کر سکتا جھوٹ بول رہا ہے۔ ایماندار لیڈر آئیں گے تو ملک کی تقدیر بدل جائے گی۔ قوم کو مخلص اور ایماندار قیادت کی ضرورت ہے۔‘
پرویز خٹک نے کہا کہ صوبے میں صحت کارڈ میں نے شروع کیا بانی پی ٹی آئی تو بے خبر تھا، وہ صرف امیروں سے تعلق بناتا اور پیسے کھانے کے بعد چھوڑ دیتا تھا، وہ ایک مغرور اور لاپرواہ انسان ہے۔