عالمی شہرت یافتہ اور چیمپئن فٹبالر لیونل میسی سعودی عرب میں سیاحت کو فروغ دینے کی تشہیری مہم کا حصہ بن گئے ہیں۔
ارجنٹائن کے اسٹار اور چیمپئن فٹبالر لیونل میسی جو سعودی عرب کے سیاحتی سفیر بھی ہیں اب سعودی ٹور ازم اتھارٹی کی نئی تشہیری مہم کے ذریعے مملکت میں سیاحت کو فروغ دینے کی کوششوں کا حصہ بن گئے ہیں۔
اس حوالے سے سعودی ٹورازم اتھارٹی کی جانب سے ایک دلچسپ ویڈیو جاری کی گئی ہے جس میں انہیں فٹبال کو کک مارتے ہوئے دیواریں توڑ کر اس کے پیچھے سعودی عرب کا مثبت چہرہ دکھایا گیا ہے اور میسی اس ویڈیو میں دنیا کو یہ پیغام دیتے دکھائی دیتے ہیں کہ وہ سعودی عرب سے متعلق غلط فہمیوں کو دور کر کے روایتی سوچ سے آگے بڑھ کر دیکھیں۔
اس ویڈیو میں دیکھا جا سکتا ہے کہ میسی جو پہلی دیوار کو فٹبال کے ذریعے توڑتے ہیں اس پر ’’صرف ایک صحرا‘‘ درج ہے جب کہ دیوار ٹوٹنے کے بعد اس کے عقت میں بحیرہ احمر کے خوبصورت اور شفاف نیلے پانیوں، آبی حیات، عسیر کے پہاڑوں، تبوک میں برف کے نظارے دکھائے گئے ہیں۔ اس میں جدہ کورنیش اور ریاض کے مجدول ٹاور کی خوبصورتی دیکھی جا سکتی ہے۔
انٹر میامی کلب کے اسٹار کھلاڑی فٹ بال کو دوسری دیوار توڑتے ہیں جس پر ’ زیادہ کچھ نہیں ہو رہا‘ درج ہے اور اس کے پیچھے ریاض سیزن، العلا اور ساؤنڈ سٹروم جیسے دلچسپ پروگرام دکھائے جاتے ہیں۔
اسی ویڈیو میں سعودی عرب کی ثقافت اور خواتین کی کامیابیوں کو اجاگر کرتے ہوئے ایک اور غلط فہمی کو دور کیا گیا ہے۔ جس میں ’بند ثقافت‘ اور ’لڑکیاں نہیں کر سکتیں‘ کی عبارتوں والی دیواروں سے فٹ بال ٹکراتی ہے اور جیسے ہی میسی آخری دیوار گرانے کے لیے تیاری کرتے ہیں ایک لڑکی فٹ بال کو ٹھوکر مار کر یہ دیوار گراتی ہے جس کے پیچھے سعودی خواتین قومی فٹ بال ٹیم، سعودی ڈی جے کے علاوہ خلا میں جانے والی پہلی سعودی خاتون ریانہ برناوی نظر آتی ہیں۔
Come and see what Lionel Messi discovered in Saudi and experience a world beyond your expectations.#ShareYourSaudi #VisitSaudi pic.twitter.com/8pixzg8Khp
— Visit Saudi (@VisitSaudi) January 26, 2024
میسی نے اپنی نئی تشہیری ویڈیو میں پیغام دیا ہے کہ مجھے مملکت کے بارے میں جو چیز پسند ہے وہ یہ کہ میں نے یہاں وہ چیز دریافت کی جس کی توقع نہیں کی تھی۔
تشہیری مہم میں خاص طور پر یہ کہا گیا ہے کہ جو لوگ سعودی ثقافت کو جانتے ہیں اپنے تجربات کو سوشل میڈیا پر #ShareYourSaudi ہیش ٹیگ کے ساتھ شیئر کریں۔