اسلام آباد : الیکشن کمیشن نے ہنگامی اجلاس طلب کرلیا، جس میں بعض حلقوں میں بیلٹ پیپرز کی دوبارہ چھپائی کا معاملہ زیرغور آئے گا۔
تفصیلات کے مطابق بعض حلقوں میں بیلٹ پیپرز کی دوبارہ چھپائی کے معاملے پر الیکشن کمیشن کا ہنگامی اجلاس آج ہوگا۔
ذرائع الیکشن کمیشن نے بتایا کہ اجلاس میں ممبران الیکشن کمیشن، تینوں پرنٹنگ پریسوں کے ایم ڈیز کو بھی بلایا گیا ہے۔
ذرائع نے بتایا کہ انتخابات کے لیے بیلٹ پیپرز کی پرنٹنگ آخری مراحل میں ہے کچھ حلقوں میں دوبارہ بیلٹ پیپرز کی چھپائی کرنی پڑ رہی ہے ،اس مرحلہ پر درکار خصوصی سیکیورٹی کاغذ کی دستیابی اور بروقت چھپائی کی تکمیل ایک بڑا چیلنج بن گیا ہے۔
انتخابات کیلئے امیدواروں کی کثیر تعداد کے پیش نظر 2170 ٹن خصوصی سیکیورٹی کاغذ استعمال ہو رہا ہے، کچھ حلقوں میں بیلٹ پیپرز کی دوبارہ چھپائی کے لیے درکار خصوصی سیکیورٹی کاغذ کی اس مرحلہ پر بروقت دستیابی بڑا چیلنج بن کر سامنے آیا ہے۔
ذرائع کے مطابق ان حلقوں میں بیلٹ پیپرز کی چھپائی کو تمام حلقوں کے بیلٹ پیپرز کی طباعت کے بعد ہوگا ، یہ چھپائی بچ جانے والے خصوصی فیچروالے پیپر کی دستیابی سے مشروط کی گئی ہے۔