بھارت کی ریاست اتر پردیش میں حکومت کی اجتماعی شادی اسکیم میں اسکینڈل سامنے آیا ہے جس نے ہر کسی کو حیران کر دیا۔
میڈیا رپورٹس کے مطابق اتر پردیش کے شہر بلیا میں حکومتی اسکیم کے تحت 25 جنوری کو 568 جوڑوں کی اجتماعی شادی کیلیے تقریب منعقد کی گئی تھی۔
لیکن اس میں دلہنوں کی بڑی تعداد نے بغیر دولہوں کے شادی کی۔ سوشل میڈیا پر ایک ویڈیو سامنے آئی جس میں دلہنیں خود کو ’ورمالا‘ پہناتی نظر آئیں۔
جب مذکورہ معاملہ حکام کے علم میں آیا تو اس کی تحقیقات کیلیے کمیٹی تشکیل دی گئی جس نے بغیر دولہوں کے شادی کر کے سہولیات حاصل کرنے والی دلہنوں کی شناخت کی
تحقیقات میں انکشاف سامنے آیا کہ لڑکیوں کو پیسوں کا لالچ دے کر اسکیم میں رجسٹرڈ کروایا گیا تھا تاکہ حکومت کی جانب سے رقم حاصل ہو۔
ضلعی انتظامیہ نے اس میں ملوث ملزمان کے خلاف مقدمہ درج کرنے کا حکم جاری کیا۔ انتظامیہ کے مطابق اسکینڈل سامنے آنے کے بعد رقم کی فراہمی فوری طور پر روک دی گئی۔
خیال رہے کہ حکومتی اسکیم کے تحت جوڑے کو 51 ہزار روپے دیے جاتے ہیں۔