پاکستان مسلم لیگ ن کی نائب صدر مریم نواز نے کہا ہے کہ نواز شریف سیاست سے کنارہ کش نہیں ہو رہے ہیں۔
اے آر وائی نیوز کے مطابق پاکستان مسلم لیگ ن کی نائب صدر اور پارٹی کی جانب سے پنجاب کی وزارت اعلیٰ کے لیے نامزد امیدوار مریم نواز نے سابق وزیراعظم نواز شریف کے سیاست سے کنارہ کش ہونے کی افواہوں کی تردید کر دی ہے۔
مریم نواز نے سماجی رابطوں کی ویب سائٹ ایکس پر ٹویٹ کیا ہے جس میں ان کا کہنا ہے کہ نواز شریف سیاست سے کنارہ کش نہیں ہو رہے ہیں۔ وزارت عظمیٰ کا عہدہ قبول نہ کرنے کا مطلب ہرگز یہ نہیں کہ سیاست چھوڑ دی ہے۔
رہنما ن لیگ نے کہا کہ نواز شریف اگلے پانچ سال نہ صرف سیاست بلکہ وفاق اور پنجاب حکومتوں کی سرپرستی کریں گے۔ شہباز شریف اور میں ان کے سپاہی ہیں، ہم نواز شریف کے حکم کے پابند ہیں، ان کی سربراہی اور نگرانی میں کام کریں گے۔
وزارت عظمیٰ کا عہدہ قبول نا کرنے کا مطلب اگر یہ اخذ کیا جا رہا ہے کہ نواز شریف سیاست سے کنارہ کش ہو رہے ہیں تو اس میں کوئی سچائی نہیں۔ اگلے ۵ سال وہ نا صرف بھرپور سیاست کریں گے بلکہ وفاق و پنجاب میں اپنی حکومتوں کی سرپرستی کریں گے انشاءاللّہ۔
نوازشریف کی تینوں حکومتوں میں عوام…— Maryam Nawaz Sharif (@MaryamNSharif) February 14, 2024
انہوں نے کہا کہ نواز شریف واضح کر چکے کہ تینوں حکومتوں میں عوام نے واضح اکثریت دی اور وہ کسی مخلوط حکومت کا حصہ نہیں بنیں گے، جو لوگ نواز شریف کے مزاج سے واقف ہیں انہیں ان کے اصولی موقف کا پتہ ہے۔