بھارتی آل راؤنڈر رویندر جڈیجا نے انگلینڈ کے خلاف تیسرے ٹیسٹ میں ملنے والا پلیئر آف دی میچ کا ایوارڈ اپنی شریک حیات ریوابا کے نام کردیا۔
کرکٹر جڈیجا نے اپنے والد انیرودھ سنگھ کے متنازع بیان کے بعد یہ اقدام کیا۔ ان کے والد انیرودھ جڈیجا کا کہنا تھا کہ بیٹے اور بہو کے ساتھ ان کا کوئی رشتہ نہیں ہے، رویندر اور ریوابا کی شادی کے کچھ ہی ماہ بعد گھر میں مسائل شروع ہوگئے تھے، بیٹا بیوی کا غلام بن گیا ہے۔
جڈیجا نے اپنے ہوم گراؤنڈ پر مین آف دی میچ کا اعزاز حاصل کیا تھا جو ان کے لیے خصوصی اہمیت رکھتا ہے۔
بی سی سی آئی کی جانب سے پوسٹ کی گئی ایک ویڈیو میں ان کا کہنا تھا کہ میں یہ ایوارڈ اپنی اہلیہ کے نام کرنا چاہوں گا۔ وہ پردے کے پیچھے ذہنی طور پر سخت محنت کر رہی ہیں۔ وہ ہمیشہ مجھے اعتماد دیتی ہیں۔
آل راؤنڈر نے تیسرا ٹیسٹ شروع ہونے سے چند دن قبل اپنے والد کے الزامات کے چند گھنٹے بعد کھل کر اپنی بیوی ریوابا کی حمایت کی تھی۔
ان کا کہنا تھا کہ دیویا بھاسکر کے ساتھ مشکوک انٹرویو میں جن باتوں کا ذکر کیا گیا ہے وہ بے معنی اور جھوٹے ہیں۔ یہ یک طرفہ تبصرے ہیں جن کی میں تردید کرتا ہوں۔
انھوں نے مزید کہا کہ میری بیوی کی امیج کو داغدار کرنے کی کوشش نامناسب اور قابل مذمت ہے۔ میرے پاس بھی کہنے کو بہت کچھ ہے لیکن یہ بہتر ہے کہ میں ان چیزوں کو عوام میں ظاہر نہ کروں۔
واضح رہے کہ بھارت کی راجکوٹ ٹیسٹ میں 434 رنز کی فتح میں انھوں نے اہم کردار ادا کیا تھا اور سنچری اسکور کرنے کے ساتھ ساتھ 7 وکٹیں حاصل کی تھیں۔