محکمہ موسمیات نے کل (جمعہ) کو کراچی میں گرج چمک کے ساتھ تیز بارش کی پیشگوئی کی ہے جس کے پیش نظر کل شہر قائد میں آدھے دن کی چھٹی کا اعلان کیا ہے۔
اے آر وائی نیوز کے مطابق محکمہ موسمیات نے کل جمعے کو کراچی میں تیز بارش کی پیشگوئی کر رکھی ہے جس کے باعث سندھ حکومت نے پہلے رین ایمرجنسی نافذ کرتے ہوئے تعلیمی اداروں میں چھٹی کا اعلان کر دیا تھا اور اب کراچی ڈویژن کے سرکاری اور نیم سرکاری دفاتر میں آدھے دن کی چھٹی کا اعلان کر دیا ہے۔
اس سلسلے میں سندھ حکومت کی جانب سے نوٹیفکیشن جاری کر دیا گیا ہے جس میں تمام کارپوریشن، لوکل کونسلز کے دفاتر دوپہر 2 بجے بند کرنے کی ہدایت کی ہے۔
اس نوٹیفکیشن کا اطلاق بنیادی اور ایمرجنسی ڈیوٹی انجام دینے والوں پر نہیں ہوگا۔
خیال رہے ملک بھر میں آج سےدھواں دھاربارشوں کا نیا اسپیل شروع ہونے کا امکان ہے، ایران کے راستے داخل ہونے والا مغربی ہواؤں کا ایک اور تگڑا سسٹم بلوچستان، سندھ ، خیبرپختونخوا اور گلگت بلتستان کے بیشتر حصوں پر اثراندازہوگا۔
نیشنل ڈیزاسٹر مینجمنٹ اتھارٹی نے ممکنہ بارشوں اور برف باری سے متعلق الرٹ جاری کردیا ہے، این ڈی ایم اے کے مطابق تیز بارشوں سے کراچی،، حیدرآباد، گوادر، پشاور، مردان، میں سیلابی صورتحال ہوسکتی ہے۔
صورتحال کے پیش نظر وزیر اعلیٰ سندھ سید مراد علی شاہ نے صوبے میں رین ایمرجنسی نافذ کرتے ہوئے تمام بلدیاتی اداروں، انتظامیہ اور اسپتالوں کو ہائی الرٹ کر دیا ہے۔