ممبئی: ’دی کپل شرما شو‘ کے میزبان و معروف کامیڈین کپل شرما کو گوالیار ہائی کورٹ سے بڑا ریلیف مل گیا۔
میڈیا رپورٹس کے مطابق گوالیار ہائی کورٹ نے کامیڈین کے حق میں فیصلہ سناتے ہوئے کپل شرما اور ان کے مقبول شو کے خلاف دائر درخواست خراج کر دی۔
دو سال قبل دائر کی گئی درخواست میں الزام لگایا گیا تھا کہ ’دی کپ شرما شو‘ میں قابلِ اعتراض گفتگو کی جاتی ہے جس میں خواتین اور عدلیہ کی توہین کرنے والے ریمارکس بھی شامل ہیں۔
درخواست گزار ایڈووکیٹ سریش ڈھاکڈ نے دلیل دی تھی کہ شراب نوشی کرنے والے اداکاروں کی تصویر کشی اور اشتعال انگیز ریمارکس عدالتی نظام کی توہین کرتے ہیں۔
انہوں نے دفعہ 356/3 کے تحت قانونی کارروائی کی استدعا کی تھی اور کپل شرما اور شو کے پروڈیوسرز کے خلاف ایف آئی آر درج کرنے کی اپیل کی تھی۔
تاہم کورٹ نے دعووں کو مسترد کرتے ہوئے درخواست خراج کی اور ساتھ ہی درخواست گزار کو خبردار کیا کہ ذاتی تشہیر کیلیے قانونی نظام کا غلط استعمال نہ کیا جائے۔
دوسری جانب کپل شرما فی الحال اپنے شو ’دی گریٹ انڈین کپل شرما‘ کا انتظار کر رہے ہیں جس کا ٹریلر کل 23 مارچ کو ریلیز کیا جائے گا۔
علاوہ ازیں، معروف کامیڈین بالی وڈ اداکارہ تبو، کرینہ کپور اور کریتی سینن کے فلم ’کریو‘ میں بھی نظر آئیں گے۔ راجیش کرشنن کی ہدایت کاری میں بننے والی فلم 29 مارچ کو سینما گھروں میں ریلیز کی جائے گی۔