وفاقی وزیر داخلہ محسن نقوی نے کہا ہے کہ بلوچستان میں بسنے والے محب وطن پاکستانی ہیں اور صوبے کی پائیدار ترقی کا تعلق امن سے جڑا ہوا ہے۔
اے آر وائی نیوز کے مطابق وفاقی وزیر داخلہ محسن نقوی نے ہیڈ کوارٹرز نارتھ فرنٹیئر کور بلوچستان کا دورہ کیا، جہاں فرنٹیئر کور نارتھ کے آئی جی میجر جنرل امیر اجمل چوہدری نے ان کا استقبال کیا جب کہ چاک وچوبند دستے نے انہیں سلامی پیش کی۔
وزیر داخلہ نے یادگار شہدا پر حاضری دی، پھول رکھے اور فاتحہ خوانی کی۔ محسن نقوی نے شہدا کے بلند درجات کے لیے دعا کی اور ان کی قربانیوں کو خراج عقیدت بھی پیش کیا۔
اس موقع پر وزیر داخلہ نے میوزیم کا دورہ کیا اور تاریخی نوادرات میں گہری دلچسپی کا اظہار کیا جب کہ جدید آلات کا بھی معائنہ کیا۔
وفاقی وزیر داخلہ کی زیر صدارت فرنٹیئر کور نارتھ کے ہیڈ کوارٹر میں اجلاس ہوا جس میں انہیں ایف سی نارتھ کی پیشہ ورانہ کارکردگی سے متعلق بریفنگ دی گئی۔
اجلاس سے خطاب کرتے ہوئے ان کا کہنا تھا کہ بلوچستان میں بسنے والے محب وطن پاکستانی ہیں اور صوبے کی پائیدار ترقی کا تعلق یہاں پائیدار امن سے جڑا ہوا ہے۔
محسن نقوی نے بلوچستان میں امن کے لیے فرنٹیئر کور نارتھ کی خدمات کو سراہتے ہوئے کہا کہ انہوں نے صوبے میں امن کے لیے ہر اول دستے کا کردار ادا کیا۔ ایف سی کے افسران، جوانوں کی پیشہ ورانہ مہارت اور بہادری پر ناز ہے۔