پشاور: وزیراعلٰی علی امین گنڈاپور کا لوڈشیڈنگ کم کرنے کیلئے وفاقی حکومت کو دیئے گئے الٹی میٹم کا وقت ختم ہوگیا۔
تفصیلات کے مطابق وزیراعلٰی علی امین گنڈاپورکے وفاق کو لوڈشیڈنگ کم کرنے کیلئے الٹی میٹم کا وقت ختم ہوگیا لیکن وفاق کی جانب سے لوڈشیڈنگ دورانیے میں کمی کی کوئی ہدایات جاری نہ ہوسکیں
پیسکو آفس کے کنٹرول سنبھالنے کے دھمکی پر بھی وفاق خاموش ہیں، پیسکو ترجمان نے بتایا کہ لوڈشیڈنگ لائن لاسز کی بنیاد پر کی جاتی ہے، جہاں لاسز زیادہ ہوں لوڈمینجمنٹ زیادہ، جہاں کم وہاں لوڈشیڈنگ کم ہوتی ہے۔
زیادہ لاسز والےعلاقوں میں کم لوڈشیڈنگ کی تو کم لاسز والے ایریازپربوجھ آئیگا، فی الحال پرانے شیڈول کے مطابق ہی لوڈشیڈنگ کی جارہی ہے، وفاق کی جانب سے ہدایات ملتے ہی عملدرآمد شروع کردیا جائے گا۔
یاد رہے وزیر اعلیٰ خیبر پختونخوا علی امین گنڈاپور نے پشاور الیکٹرک سپلائی کمپنی (پیسکو) کو وارننگ دیتے ہوئے لوڈشیڈنگ کم کرنے کی ہدایت کی تھی۔
علی امین گنڈاپورکا کہنا تھا کہ آج رات تک لوڈشیڈنگ کم نہ ہوئی تو کل پیسکو کا انتظام سنبھالوں گا، وفاقی حکومت اور وزیر توانائی کو پیغام دے رہا ہوں، متعدد بار بجلی کی لوڈشیڈنگ کا مسئلہ حل کرنے کا کہا ہے۔
وزیر اعلیٰ کے پی نے مزید کہا تھا کہ آپ سے شرافت کی زبان استعمال کریں تو ہمیں کمزور سمجھتے ہیں، پیسکو چیف اگر صوبے میں رہے گا تو میرے شیڈول کے مطابق چلے گا۔