اسلام آباد: چیئرمین ایف بی آر نے کہا ہے کہ آئندہ مالی سال کیلئے 3800 ارب روپے زائد اضافی ہدف حاصل کرنا ہوگا۔
چیئرمین ایف بی آر امجد زبیر ٹوانہ اور ممبران کی جانب سے پوسٹ بجٹ بریفنگ دی گئی، چیئرمین ایف بی آر کا کہنا تھا کہ ہم نے سیلز اور کسٹم میں ٹیکس چھوٹ ختم کی ہے، پالیسی، انفورسمنٹ سے 1800 ارب کے ٹیکسز جمع کیے جائیں گے۔
امجد زبیر ٹوانہ نے کہا کہ 400 سے 450 ارب روپے کی ٹیکس چھوٹ ختم کی گئی ہے، کسٹمز ڈیوٹی کی مد میں 150 ارب روپے کی ٹیکس چھوٹ کو ختم کیا گیا۔
چیئرمین ایف بی آر نے کہا کہ تنخواہ دار طبقے پر 75 ارب روپے کا ٹیکس بوجھ ڈالا گیا ہے، غیرتنخواہ دار طبقے پر ٹیکسوں کا بوجھ 150 ارب روپے ہوگا۔
غیرمنقولہ جائیداد پر5 فیصد ایکسائز ڈیوٹی لگائی گئی ہے، پلاٹس اور کمرشل پراپرٹیز پر بھی ایکسائز ڈیوٹی لگائی گئی ہے۔
چیئرمین ایف بی آر کا مزید کہنا تھا کہ ایکسپورٹس کو نارمل ٹیکس ریجیم میں لایا جارہا ہے، ریٹیلرز پر ودہولڈنگ ٹیکس کی شرح کو بڑھایا گیا ہے۔