بھارتی پولیس نے باپ اور بیٹی کے رشتے پر نازیبا تبصرہ کرنے والے یوٹیوبر کو ریاست کرناٹک کے شہر بنگلورو سے گرفتار کر لیا۔
میڈیا رپورٹس کے مطابق یوٹیوبر کی شناخت پرنیت کے نام سے ہوئی جس نے اپنے ایک پوڈکاسٹ میں والد اور بیٹی کے رشتے پر قابلِ اعتراض تبصرہ کیا تھا جس کے بعد سوشل میڈیا پر ان کے خلاف صارفین میں خاصا غصہ پایا گیا۔
یوٹیوبر پرنیت کے خلاف کارروائی کیلیے آندھرا پردیش اور دیگر ریاستوں میں پولیس سے رجوع کیا گیا جس کے بعد ملزم کی گرفتاری عمل میں لائی گئی۔
پولیس نے 29 سالہ ملزم کو عدالت میں پیش کیا جہاں اسے 14 روز کیلیے جوڈیشل ریمانڈر پر بھیج دیا گیا۔ پرنیت کے خلاف مختلف دفعات کے تحت مقدمہ درج کیا گیا۔
اس سے قبل اپریل میں کرناٹک کے شہر بنگلورو میں پولیس نے 23 سالہ یوٹیوبر وکاس گوڈا کو کیمپگوڈا انٹرنینشل ایئرپورٹ پر انوکھی حرکت کرنے کے جرم میں گرفتار کیا تھا۔
وکاس گوڈا کی گرفتار اُس وقت عمل میں لائی گئی تھی جب کیمپگوڈا انٹرنینشل ایئرپورٹ کی سکیورٹی نے پولیس میں شکایت درج کروائی تھی کہ ملزم نے ہوائی اڈے پر 24 گھنٹے گزانے کا غلط دعویٰ کیا اور سکیورٹی پروٹوکول کی خلاف ورزی کی۔
ملزم 7 اپریل کو ایئر انڈیا کی بنگالورو سے چینائی فلائٹ کی ٹکٹ لیے ہوائی اڈے میں داخل ہوا تھا لیکن پرواز میں سوار ہونے کے بجائے وہ ہوائی اڈے پر گھومتا رہا اور موبائل فون سے ویلاگ ریکارڈ کرتا رہا۔
اس نے پانچ دن بعد اپنے یوٹیوب چینل پر 24 گھنٹے پر مشتمل ویلاگ اپلوڈ کیا تھا جس میں اس کا کہنا تھا کہ ایئرپورٹ پر کوئی مجھ سے پوچھنے والا نہیں تھا اور سکیورٹی اہلکاروں نے بھی مجھ سے کوئی سوال نہیں کیا۔
جب معاملہ 15 اپریل کو ایئرپورٹ انتظامیہ کے علم میں آیا تو انہوں نے پولیس میں یوٹیوبر کے خلاف شکایت درج کرروائی جس کے بعد اسے گرفتار کیا گیا تھا۔