آئی پی پیز کو کیپسٹی پیمنٹس کی مد میں اربوں روپے کی ادائیگیوں کے معاملے پر سینیٹ کی قائمہ کمیٹی پاور نے آئی پی پیز معاہدوں کی تفصیلات طلب کر لیں۔
کمیٹی کی جانب سے سیکرٹری پاور ڈویژن کو سوالنامہ بھجوا دیا گیا۔ پلانٹس کا قیمتوں کے لحاظ سے خطے کے ممالک کے ساتھ موازنہ طلب کیا گیا جب کہ گزشتہ 20سال میں آئی پی پیز کو کیپسٹی پیمنٹس کی تفصیلات مانگ لی گئیں۔
قائمہ کمیٹی کا کہنا ہے کہ آئی پی پیز کی کیپسٹی پیمنٹس کی وجوہات بھی فراہم کی جائیں۔ نجی شعبے میں لگنے والے تمام پلانٹس کے اسپانسرز کی تفصیلات اور گزشتہ 6 سال میں لگنے والے ونڈ پاور پلانٹس کی پیداواری لاگت کی تفصیلات بھی طلب کی گئی ہیں۔
قائمہ کمیٹی نے کہا کہ ونڈپاور پلانٹس کی تعمیری لاگت کی تفصیلات بھی فراہم کی جائیں اور آئی پی پیز کے ساتھ موجودہ معاہدوں سے متعلق کمیٹی کو آگاہ کیا جائے۔
آئی پی پیز سے مختلف اوقات میں معاہدوں میں کی جانے والی تبدیلیوں کی تفصیلات اور آئی پی پیز کی موجودہ پیداواری صلاحیت اور قیام کے وقت کی صلاحیت کی تفصیلات طلب کی گئی ہیں۔
1992میں گیس اور فرنس آئل پر چلنے والے 50میگاواٹ سے زائد کے پلانٹس کی معلومات طلب کی گئی ہیں۔ سیکرٹری پاور سے تمام متعلقہ معلومات 2سے 3ہفتوں میں مانگی گئی ہیں۔