اسلام آباد: وزیراعظم شہباز شریف کا کہنا ہے کہ معاشی اصلاحات کے ثمرات عوام تک پہنچا کر دم لیں گے۔
اے آر وائی نیوز کے مطابق وزیراعظم شہباز شریف نے عالمی کریڈٹ ریٹنگ ایجنسی ’فچ‘ کی طرف سے پاکستان کی ریٹنگ ٹرپل سی پلس کرنے پر خیرمقدم کیا اور وزیر خزانہ محمد اورنگزیب، معاشی ٹیم کی محنت و کاوشوں کو سراہا۔
انہوں نے کہا کہ ریاست کی خاطر سیاست کی قربانی کا ثمر آج معاشی بہتری کی صورت میں مل رہا ہے، پاکستان کی عالمی ریٹنگ ٹرپل سی پلس ہونا درست معاشی پالیسی کا عالمی اعتراف ہے۔
شہباز شریف نے کہا کہ معاشی اصلاحات کے ایجنڈے پر دن رات کام کررہے ہیں، فچ اور دیگر عالمی مالیاتی اداروں کی رپورٹس پاکستان کی معاشی بہتری کے حوالے سے اہم ہیں۔
وزیراعظم نے کہا کہ پاکستان کی معاشی بہتری کے راستے پر مزید محنت اور جذبے سے آگے بڑھیں گے، امید ہے آئی ایم ایف کے نئے پروگرام سے پاکستان کی معاشی بہتری میں مزید اضافہ ہوگا۔
انہوں نے مزید کہا کہ اسٹیٹ بینک کی جانب سے شرح سود میں مزید ایک فیصد کمی کا اعلان بھی معاشی بہتری کی ایک جھلک ہے، شرح سود میں کمی سے افراط زر میں مزید کمی ہوگی اور کاروباری سرگرمیوں میں اضافہ ہوگا۔