اسلام آباد: وزیراعظم شہباز شریف کی ہدایت پر ملک کے 77ویں یوم آزادی کے موقع پر ’عزم استحکام‘ کے عنوان سے خصوصی ڈاک ٹکٹ جاری کردیا گیا۔
اے آر وائی نیوز کے مطابق ڈاک ٹکٹ پر پاکستان کے جیولن تھروور ارشد ندیم کی تصویر لگا کر انہیں خراج تحسین پیش کیا گیا ہے۔
ڈاک ٹکٹ کو عزم استحکام کا عنوان دیا گیا ہے جو ملک کی ترقی اور استحکام کے عزم کا منہ بولتا ثبوت ہے۔
حکومت کی جانب سے جاری کردہ خصوصی ڈاک ٹکٹ میں مینار پاکستان کی تصویر کو شامل کرکے پاکستان کی آزادی کی جدوجہد کو اجاگر کیا گیا ہے، یہ ٹکٹ آنے والی نسلوں کو پاکستان کی آزادی کی جدوجہد اور عزم سے آگاہ کرے گا۔
واضح رہے کہ پیرس اولمپکس کے جیولین تھرو مقابلے میں ارشد ندیم نے 92.97 میٹر فاصلے پر نیزہ پھینک کر نیا اولمپک ریکارڈ قائم کیا ہے۔
ارشد ندیم گولڈ میڈل حاصل کرکے نوجوان نسل کے لیے مثال بن گئے ہیں۔
یاد رہے کہ صدر مملکت آصف علی زرداری نے پاکستانی ایتھلیٹ ارشد ندیم کو پیرس اولمپکس میں ریکارڈ کارکردگی پر ہلال امتیاز سے نوازنے کی ہدایت دے دی۔