لاہور: وزیر اعلیٰ پنجاب مریم نواز نے عوام کو بجلی کے بلوں میں ریلیف دینے کیلیے بڑا پروجیکٹ لانے کا اعلان کر دیا۔
مریم نواز کی زیرِ صدارت صوبائی کابینہ کا 13واں اجلاس ہوا جس میں بجلی کے بلوں میں ریلیف دینے کیلیے اہم فیصلے کیے گئے جبکہ چیف منسٹر روشن گھرانہ پروگرام اور اپنا گھر اپنی چھت کے ماڈل گھر کی منظوری دی گئی جس کے تحت شہر میں 5 اور دیہات میں 10 مرلے پلاٹ پر گھر کیلیے 15 لاکھ روپے ملیں گے۔
اجلاس میں بتایا گیا کہ پنجاب بھر میں 100 یونٹ تک کے پروٹیکٹڈ صارفین کو سولر ہوم سیلوشن فراہم کیا جائے گا۔ اجلاس میں بھکی، بلوکی اور قائد اعظم سولر پارک سے انڈسٹریل پارک کو سستی بجلی فراہم کرنے پر غور کیا گیا۔
شرکا کو بتایا گیا کہ دسمبر تک پنجاب میں اسپیڈو کے بعد الیکٹرو بس چلیں گی جس کیلیے کابینہ کو ماڈل پیش کیا گیا۔
اجلاس میں 8 ممالک میں پاکستانیوں کو ریونیو سروسز کیلیے رجسٹریشن ایکٹ 1908 میں ترمیم کی منظوری سمیت پنجاب گورنمنٹ ایڈورٹائزمنٹ پالیسی، راولپنڈی سے مری تک ٹورسٹ گلاس ٹرین کی فزیبلٹی اسٹڈی اور انڈسٹریز کو براہ راست بجلی کی فراہمی کیلیے پنجاب گرڈ کمپنی کے قیام کی منظوری دی گئی۔
لاہور میں الیکٹرو بسیں چلانے کے پروجیکٹ کی منظوری دی گئی جس کے مطابق 27 بسیں دسمبر تک آ جائیں گی۔
اجلاس میں اظہارِ خیال کرتے ہوئے مریم نواز کا کہنا تھا کہ آئندہ 2 ماہ میں عوام کو بجلی کے بلوں میں ریلیف دینے کیلیے بڑا پروجیکٹ لا رہے ہیں۔
انہوں نے بتایا کہ مری گلاس ٹورسٹ ٹرین سیاحت کی ترقی کیلیے نواز شریف کا بہت بڑا ویژن ہے، مری کی سیاحتی ترقی کیلیے گلاس ٹرین میرا خواب ہے جو صرف پنجاب نہیں بلکہ پاکستان کا اپنی طرز کا پہلا منفرد پروجیکٹ ہے۔