اسلام آباد: جولائی 2023 کے مقابلے میں جولائی 2024 میں آئی ٹی سیکٹر کی برآمدات میں 34 فیصد اضافہ ہوگیا۔
جولائی 2024 میں آئی ٹی سیکٹر کی برآمدات 28 کروڑ 60 لاکھ ڈالر تک پہنچ گئی تاہم جون 2024 کے مقابلے میں برآمدات میں 4 فیصد کمی ریکارڈ کی گئی۔ جون میں برآمدات 29 کروڑ 80 لاکھ ڈالر رہی تھی۔
سال 24-2023 میں آئی ٹی سیکٹر کی برآمدات 3 ارب 20 کروڑ ڈالر کی بلند سطح پر تھی۔
ماہرین کہتے ہیں کہ روپے کی قدر میں استحکام سے بھی برآمدات کی رقم میں اضافہ ہوا ہے، اسپیشل فارن کرنسی اکاؤنٹ کی حد 35 فیصد سے بڑھا کر 50 فیصد کرنے کے مثبت اثرات آئے، برآمدات کی رقم واپس ملک میں لاکر کاروبار بھی بڑھ رہا ہے۔
جولائی میں رواں سال آئی ٹی برآمدات 3.5 ارب ڈالر تک بڑھنے کا امکان طاہر کیا گیا تھا۔
ایس آئی ایف سی کے زیرِ اہتمام آئی ٹی کے شعبے میں نمایاں کامیابیاں ملیں۔ گزشتہ مالی سال میں آئی ٹی برآمدات 2.6ارب ڈالر تک رہیں۔
حکومت نے اگلے پانچ برس میں آئی ٹی پر مبنی برآمدات کو 15 ارب ڈالر تک بڑھانے کا ہدف مقرر کر رکھا ہے۔ شعبے میں برآمداتی صلاحیات کے پیشِ نظر حکومت نے رواں مالی سال میں 79 ارب روپے سے زائد کی خطیر رقم مختص کی ہے۔
وفاقی وزیر خزانہ محمد اورنگزیب کے مطابق 79 ارب روپے کی اس مختص کردہ رقم میں سے 19 ارب روپے کراچی اور اسلام آباد میں آئی ٹی پارک کے قیام میں صرف ہوں گے جبکہ 22 ارب روپے پاکستان سافٹ وئیر ایکسپورٹ بورڈ کیلیے مختص کیے گئے ہیں۔
چئیرمین پاکستان آئی ٹی انڈسٹری ایسوسی ایشن کا کہنا تھا کہ ڈیجیٹل اکانومی کی صلاحیت کا بھرپور فائدہ اٹھانے کیلیے ہمیں آئی ٹی انفراسٹرکچر میں بہتری لانے اور ہنر مند افرادی قوت میں اضافے کی ضرورت ہے۔
جدید صنعتی معیار کے مطابق آئی ٹی کے شعبے کی تعمیر کیلیے ڈیجیٹل انفراسٹرکچر اور انٹرنیٹ کی کنکٹیوٹی کو بڑھانے کی اشد ضرورت ہے۔
ایس آئی ایف سی کی سہولت کاری کے باعث آئی ٹی کے شعبے میں تیزی سے ترقی ہو رہی ہے اور بہت سے اسٹارٹ اپس وجود میں آئے ہیں جو خود کو عالمی سطح پر متعارف کروا رہے ہیں۔