معروف بھارتی کاروباری ٹائیکون انیل امبانی پر کاروبار کرنے پر پابندی اور 25 کروڑ روپے جرمانہ عائد کیا گیا ہے۔
بھارتی میڈیا کے مطابق سیکورٹیز اینڈ ایکسچینج بورڈ آف انڈیا (سیبی) نے مشہور بھارتی صنعتکار انیل امبانی اور ان کی کمپنی ریلائنس ہوم فنانس (آر ایچ ایف ایل) کے اعلیٰ عہدیداروں سمیت 24 دیگر افراد اور کمپنیوں پر سیکیورٹی مارکیٹ میں کاروبار کرنے پر پانچ سال کے لیے پابندی عائد کر دی ہے۔
سیبی نے انیل امبانی پر صرف پانچ سال کے لیے سیکیورٹی مارکیٹ میں کاروبار پر پابندی ہی عائد نہیں کی ہے بلکہ ان پر 25 کروڑ روپے جرمانہ بھی عائد کیا ہے۔
اس پابندی کے بعد اب انیل امبانی کسی بھی کمپنی میں ڈائریکٹر، کلیدی انتظامی عہدیدار یا مارکیٹ ریگولیٹر کے ساتھ درج کسی بھی ڈیلر کے طور پر کام نہیں کر سکیں گے۔
ان پر یہ پابندی رقوم میں خورد برد اور غیر قانونی پیسہ منتقلی سے متعلق شکایات کی تحقیقات کے بعد عائد کی گئی ہے۔
اس کے علاوہ سیسی نے ریلائنس ہوم فنانس کے خلاف بھی سخت کارروائی کرتے ہوئے اسے سیکورٹی مارکیٹ سے 6 ماہ کے لیے پابندی عائد کر دی ہے جب کہ 6 لاکھ روپے کا جرمانہ بھی عائد کیا ہے۔ یہ پابندی کمپنی کی مالیاتی سرگرمیوں کی نگرانی اور اس کے غیر قانونی اعمال کو روکنے کے لیے لگائی گئی ہے۔
سیبی کی جانب سے جاری کردہ 222 صفحات پر مشتمل تفصیلی حکم نامے میں انکشاف کیا گیا ہے کہ انیل امبانی نے ریلائنس ہوم فنانس کے اعلیٰ انتظامی اہلکاروں کی مدد سے ان کی وابستہ اداروں کو قرض کے طور پر خفیہ طور پر پیسے نکالنے کی سازش کی اور اس کے تحت انن کی کمپنی نے غیر قانونی طور پر پیسہ منتقل کیا، جس سے مارکیٹ کی شفافیت اور سرمایہ کاروں کے حقوق متاثر ہوئے۔
سیبی نے فیصلہ دینے کے ساتھ یہ بھی اعلان کیا ہے کہ انیل امبانی کے خلاف اس کارروائی کے بعد ان کی کمپنیوں اور ان کے انتظامی عملے پر مستقبل میں بھی مالیاتی دھاندلیوں اور غیر قانونی سرگرمیوں کی نگرانی جاری رکھی جائے گی۔ اس کے علاوہ وہ ایسی کسی بھی کمپنی یا فرد کے خلاف سخت کارروائی کرے گی، جو مارکیٹ قوانین کی خلاف ورزی کرتا ہے۔