برطانیہ میں فیک نیوز پھیلانے کا الزام : لاہور سے گرفتار ملزم بری

لاہور : برطانیہ میں فسادات کا سبب بننے والی فیک نیوز پھیلانے کے الزام میں گرفتار ملزم فرحان آصف کو بری کردیا گیا۔

تفصیلات کے مطابق لاہور میں جوڈیشل مجسٹریٹ محمودالرحمان ناصر نے فیک نیوز پر فسادات کیس کی سماعت کی۔

ایف آئی اے نے ملزم کو چار روزہ جسمانی ریمانڈ کے بعد پیش کیا، تفتیشی افسر نے بتایا کہ ہر طرح سے تفتیش کی گئی مگر ملزم کے خلاف کوئی ثبوت نہیں ملا، یہ پہلے سے نیوز شئیر ہوئی تھی، فرحان نے اس نیوز کو ہی آگے شئیر کیا۔

عدالت نے استفسار کیا کہ ملزم نے یہ خبر کس کے ساتھ شئیر کی اور کب ڈیلیٹ کی ، فرحان آصف نے بیان دیا کہ میں نے 6 گھنٹے بعد اسکو ڈیلیٹ کر دیا تھا۔

عدالت نے تفتیشی کے بیان کے بعد ملزم فرخان آصف کو مقدمے سے ڈسچارج کرنے کی استدعا منظور کرلی۔

ملزم کے ڈسچارج ہونے پر احاطہ عدالت میں اس کی ہتھکڑی کھول دی گئی، ملزم پر الزام تھا کہ اس نے برطانیہ میں چاقو زنی کی فیک نیوز چلائی تھی۔