آل پاکستان انجمن تاجران نے ظالمانہ ٹیکس اور تاجر دوست اسکیم کے خلاف کل 28 اگست بروز بدھ ملک بھر میں مکمل شٹر ڈاؤن ہڑتال کا اعلان کر دیا۔
صدر آل پاکستان انجمن تاجران کے صدر اجمل بلوچ نے کہا ہے کہ ملک بھر کے تاجر ظالمانہ ٹیکس کے خلاف کل اپنا ہر طرح کا کاروبار بند رکھیں گے۔
اجمل بلوچ نے کہا کہ حکومت سے کوئی مذاکرات نہیں ہو رہے، مذاکرات ہڑتال کے بعد ہوں گے۔ انہوں نے کہا کہ مذاکرات کے نام پر ہڑتال کو روکنے کے ہتھکنڈے استعمال کیے جا رہے ہیں، چند حکومتی ہم خیال نام نہاد تاجر نمائندے حکومت کی زبان بول رہے ہیں۔
انہوں نے کہا کہ حکومت کے پاس ایک ہی راستہ ہے کہ تاجر دوست ٹیکس اسکیم کا قانون واپس لے، حکومت نے ظالمانہ ٹیکس کا قانون واپس ںہ لیا تو آگے 2 دن کی ہڑتال کا اعلان کر دیں گے۔
ان کا کہنا تھا کہ خرید و فروخت میں 70 فیصد کمی ہو چکی ہے، تاجر اتنا ٹیکس دیں کہآں سے؟ تاجر ویلویشن ٹیبل ٹیکس ادا کرنے کی سکت ہی نہیں رکھتے۔
اجمل بلوچ نے کہا کہ بجلی کے بلوں اور دوکانوں کے کرایوں نے تاجروں کآ بھرکس نکال دیا ہے، ٹیکس ادا کرنے والے کو ایک ڈسپرین کی گولی تک میسر نہیں، حکمران اپنی مراعات کم کرنے کے بجائے الٹا اضافہ کر رہے ہیں۔
تاجر رہنما نے مزید کہا کہ آدھا ٹیکس قرضوں کی ادائیگی اور آدھا کرپشن کی نظر ہو جاتا ہے، جب تک کرپشن پر سزائے موت کا قانون نہیں بنایا جاتا حالات ٹھیک نہیں ہو سکتے۔