پشاور: خیبر پختونخوا حکومت نے صوبے بھر اور سیاحتی مقامات پر پلاسٹک بیگز کے استعمال پر عائد پابندی پر عملدرآمد کا فیصلہ کر لیا۔
وزیر اعلیٰ علی امین گنڈاپور کی زیرِ صدارت انوائرمنٹل پروٹیکشن کونسل کا اجلاس ہوا جس میں اہم فیصلے کیے گئے۔ اجلاس میں پلاسٹک بیگز کے استعمال اور فروخت پر مکمل پابندی کیلیے 3 مہینے کا وقت مقرر اور مقررہ ٹائم لائنز کے بعد اس کے استعمال پر سخت کارروائی کا فیصلہ کیا گیا۔
فیصلہ ہوا کہ اینٹ کی بھٹوں کو زگ زیگ ٹیکنالوجی پر منتقل کرنے کیلیے منصوبہ شروع کیا جائے گا جبکہ منصوبے کے تحت مالکان کو نرم شرائط پر قرضے فراہم کرنے کی تجویز ہے۔
اجلاس میں انوائرمنٹل پروٹیکشن کونسل کے رولز آف پروسیجرز کی منظوری دی گئی اور اسکولوں اور کالجوں کے نصاب میں کلائمیٹ چینج سے متعلق مواد شامل کرنے کا فیصلہ کیا گیا۔
محکمہ صحت کو صوبے میں اسپتالوں کے ویسٹ مینجمنٹ سے متعلق رپورٹ پیش کرنے کی ہدایت دی گئی۔ وزیر اعلیٰ علی امین گنڈاپور نے ہدایت کی کہ پھلدار درخت لگانے کیلیے خصوصی شجر کاری مہم شروع کی جائے جس میں اسکولوں، اسپتالوں اور سرکاری عمارتوں میں شجر کاری پر توجہ دی جائے۔
علی امین گنڈاپور نے مزید کہا کہ ماحولیاتی آلودگی کا مسئلہ دن بدن سنگین ہوتا جا رہا ہے۔