ممبئی: بالی وڈ اسٹار عامر خان کی سابق اہلیہ کرن راؤ کی ہدایتکاری میں بننے والی بلاک بسٹر فلم ’لاپتا لیڈیز‘ کو آسکر کیلیے منتخب کرنے کی وجہ سامنے آگئی۔
میڈیا رپورٹس کے مطابق فلم کی کہانی بھارت میں لڑکیوں کی کم عمری میں ہونے والی شادی اور اس کے بعد ان کی زندگی میں درپیش مشکلات کی عکاسی کرتی ہے۔
آسکر ایوارڈ میں بھارت کی نمائندگی کیلیے 29 فلموں کا جائزہ لیا گیا اور فیصلہ ہوا کہ ’لاپتا لیڈیز‘ کو بھیجا جائے گا۔ کرن راؤ کی فلم رواں سال ہی ریلیز کی گئی جس نے دیکھنے والوں کو خوب لطف اندوز کیا ہے۔
جن 29 فلموں کا جائزہ لیا گیا ان میں ’لاپتا لیڈیز‘ کے علاوہ اینیمل، کالکی 2898، تنگلان، جورم اور دیگر کئی ہٹ فلمیں شامل تھیں۔
آسام کے ڈائریکٹر جہنو بروا آسکر میں فلم کی باضابطہ انٹری پر 12 رکنی جیوری کے چیئرمین ہیں۔ انہوں نے بتایا کہ جیوری کو ایسی فلم کی تلاش تھی جو بھارتی معاشرے پر فلمائی گئی ہو اور جو دنیا کے سامنے ملک کا نقطہ نظر پیش کر سکے۔
جہنو بروا نے بتایا کہ 29 فلموں کا جائزہ لینے کے بعد فیصلہ ہوا کہ کرن راؤ کی فلم اس پر پورا اترتی ہے لہٰذا اسے منتخب کیا گیا، لیکن اس سے قبل تمام فلموں پر بحث کی گئی اور ان کا ہر پہلو سے مطالبہ کیا گیا۔
انہوں نے اپنے بیان میں یہ واضح کیا کہ کرن راؤ کی فلم کو منتخب کرنے کیلیے ان پر کوئی دباؤ نہیں تھا۔