امیر جماعت اسلامی حافظ نعیم الرحمان نے پانچ آئی پی یز سے معاہدے ختم کرنے کو پہلی کامیابی قرار دے دیا۔
اے آر وائی نیوز کے مطابق امیر جماعت اسلامی حافظ نعیم الرحمان کا کہنا ہے کہ وزیراعظم کی جانب سے پانچ آئی پی پیز سے معاہدے ختم کرنا قوم کی پہلی کامیابی ہے، قومی خزانے میں آنے والی رقم فوراً بجلی کے بلوں کی کمی پرخرچ کی جائے۔
انہوں نے کہا کہ مریم بی بی کہتی ہیں بھارت سے ماحولیاتی ڈپلومیسی ہونی چاہیے، بیرسٹرسیف کہتے ہیں جے شنکر پی ٹی آئی کے دھرنے سےخطاب کریں، بھائی یہ ان کو بھارت سے دوستی کے لیے پیٹ میں اتنا مروڑ کیوں ہے؟
حافظ نعیم کا کہنا تھا کہ پاکستان کسی لسانی بنیاد پر نہیں اسلامی نظریے پر بنا ہے۔
انہوں نے کہا کہ کیپسٹی پیمنٹ کا مطلب ہے جو بجلی نہیں بن رہی اس کے پیسے بھی دیں، آئی پی پیز کے ساتھ جومعاہدہ ہوا اس کا فائدہ عوام کو ہونا چاہیے۔
امیر جماعت اسلامی نے کہا کہ عوام کو اس بچت سے فائدہ اگلے ماہ کے بلوں میں ہونا چاہیے، مہنگی بجلی کے خلاف ہماری تحریک جاری رہے گی، حکومت کو بھی اپنی آئی پی پیز کو ریلیف دینا چاہیے۔
حافظ نعیم نے مزید کہا کہ صرف پانچ آْئی پی پیز کا خاتمہ آٹے میں نمک کے برابر ہے، ایسا نہ ہو پانچ آئی پی پیز کو ختم کرکے مزید پانچ کو کنٹریکٹ دے دیے جائیں۔