کرم میں سیز فائر کے باوجود کشیدگی میں کمی نہیں آسکی، فریقین میں جھڑپوں کے دوران فائرنگ سے مزید 6 افراد جاں بحق اور 8 زخمی ہوگئے۔
تفصیلات کے مطابق ضلع کرم کے مختلف مقامات پر 11 روز سے فائرنگ اور جھڑپوں کا سلسلہ جاری ہے، پولیس کا کہنا ہے کہ تازہ واقعات میں مزید 6 افراد جاں بحق اور 8 زخمی ہوگئے۔
اسپتال ذرائع کے مطابق جھڑپوں اور گاڑیوں پر فائرنگ کے واقعات میں اب تک 130 افراد جاں بحق اور 186 زخمی ہو چکے ہیں۔
ڈپٹی کمشنر جاویداللہ محسود نے بتایا ہے کہ لوئر کرم کے مختلف مقامات پر سیز فائر کرکے پولیس اور فورسز کے دستے تعینات کیے گئے ہیں جبکہ دیگر علاقوں میں آج فائر بندی کی بھرپور کوشش کی جائے گی۔
سماجی رہنما میر افضل کا کہنا ہے کہ پارا چنار پشاور مرکزی شاہراہ سمیت دیگر راستے 50 روز سے بند ہیں، شاہراہوں کی بندش سے تیل، اشیائے خورونوش اور ادویات ختم ہوگئیں ہیں۔