ایشیاکپ دوہزار پچیس کے انعقاد کےلیے متحدہ عرب امارات مضبوط امیدوار بن گیا۔
ذرائع کا کہنا ہے اتوار کو چیمپئنزٹرافی فائنل کے دوران ایشیائی ملکوں کے درمیان ایشیاکپ سے متعلق بات چیت ہو گی۔
رواں سال ستمبر میں شیڈول ایونٹ کا میزبان بھارت ہی رہےگا تاہم میچز متحدہ عرب امارات میں ہونے کے امکان ہیں۔
بھارت نے ایونٹ کی ذمہ داری بورڈ کے نائب صدر راجیو شکلا کو دی ہے۔
ایشیا کپ رواں سال دفاعی چیمپئن بھارت میں شیڈول ہے اور آئندہ برس ٹی 20 ورلڈ کپ کو مدنظر رکھتے ہوئے یہ ایونٹ بھی ٹی 20 فارمیٹ میں کھیلا جانا ہے۔
کرکٹ ویب سائٹ کے مطابق اب بھارت میں ایشیا کپ 2025 کا انعقاد کھٹائی میں پڑتا دکھائی دے رہا ہے۔ روایتی حریفوں پاکستان اور بھارت کے درمیان کشیدہ تعلقات کی وجہ سے ایشین کرکٹ کونسل (اے سی سی) ٹورنامنٹ کے لیے کسی نیوٹرل وینیو کی تلاش میں ہے۔
بتایا جا رہا ہے کہ اے سی سی ایونٹ کے لیے سری لنکا اور متحدہ عرب امارات کے بارے میں سوچ رہے ہیں تاہم ممکنہ طور پر یو اے ای انتخاب ہو سکتا ہے۔ تاہم اس کی میزبان بدستور بھارت کے پاس ہی رہے گی۔
رپورٹ کے مطابق ایشین کرکٹ کونسل نے یہ اہم فیصلہ پاکستان کی میزبانی میں کھیلی جا رہی آئی سی سی چیمپئنز ٹرافی میں پیدا ہونے والے تنازع کو دیکھ کر کیا ہے کیونکہ بھارت نے اس میگا ایونٹ کے لیے پاکستان آنے سے انکار کر دیا تھا اور ایک معاہدے کے تحت وہ اپنے میچز دبئی میں کھیل رہا ہے۔
اس معاہدے کے مطابق 2027 تک بھارت میں ہونے والے کسی ایونٹ میں پاکستان ٹیم بھارت نہیں جائے گی بلکہ اپنے تمام میچز نیوٹرل مقام پر کھیلے گی۔
ایشیا کپ کا تاحال باضابطہ شیڈول جاری نہیں کیا گیا ہے تاہم یہ رواں سال 2025 میں ہی کھیلا جائے گا۔ 2 ہفتوں تک جاری رہنے والے اس ٹورنامنٹ میں مجموعی طور پر 19 میچز کھیلے جائیں گے۔
ایشیا کپ 2025 میں پاکستان اور بھارت سمیت 8 ٹیمیں سری لنکا، افغانستان، بنگلہ دیش، عمان، یو اے ای اور نیپال شریک ہوں گی۔