شمالی کوریا کی جانب سے آرٹیفیشل انٹیلیجنس کے ذریعے حملہ کرنے والے ڈرونز کا تجربہ کیا گیا ہے۔
بین الاقوامی خبر رساں ادارے کی رپورٹ کے مطابق شمال کوریا کے رہنما کِم جونگ اُن نے بغیر پائلٹ طیاروں اور ڈرونز کی پیداوار بڑھانے کا بھی اعلان کردیا۔
جنوبی کوریا کے فوجی ترجمان کا کہنا ہے کہ شمالی کوریا کے مصنوعی ذہانت سے کیے گئے ڈرونز پر مزید معلومات حاصل کر رہے ہیں۔
قبل ازیں روس کے صدر ولادیمیر پیوٹن نے شمالی کوریا کی عوام کیلیے نایاب نسل کے 70 جانور دارالحکومت پیانگ یانگ بھیجے تھے۔
روئٹرز کے مطابق پیانگ یانگ کے چڑیا گھر بھیجے گئے جانوروں میں ایک افریقی شیر اور دو بھورے ریچھ بھی شامل ہیں۔ روسی حکومت نے کہا کہ یہ جانور صدر ولادیمیر پیوٹن کی طرف سے شمالی کوریا کے عوام کیلیے تحفہ ہے۔
روس کے قدرتی وسائل کے وزیر الیگزینڈر کوزلوف نے جانوروں کی ماسکو سے شمالی کوریا کے چڑیا گھر منتقلی کی نگرانی کی۔ جانوروں کو ہوائی جہاز کے ذریعے منتقل کیا گیا جس میں ڈاکٹر بھی موجود تھے۔
ماسکو کی طرف سے شائع کی گئی تصاویر میں ایک خوبصورت سفید طوطے کو پنجرے میں سفر کرتے ہوئے دیکھا گیا جبکہ وزیر الیگزینڈر کوزلوف مقامی حکام کے ہمراہ چڑیا گھر کا دورہ کرتے ہوئے نظر آئے۔
یاد رہے کہ روس نے گزشتہ سال اپریل میں بھی شمالی کوریا کو عقاب اور طوطے سمیت متعدد پرندے تحفے میں بھیجے تھے۔
شمالی کوریا کے فوجی ’غائب‘ ہو گئے
شمالی کوریا اور روس کے درمیان اس وقت سے قریبی تعلقات ہیں جب پیوٹن نے جون میں ملک کا دورہ کیا تھا اور شمالی کوریا کے سربراہ کم جونگ ان کے ساتھ ایک معاہدہ پر دستخط کیے تھے۔