ورسک : جنوبی وزیرستان کے علاقے اعظم ورسک میں دہشت گردوں کے انسداد پولیو ٹیم کی ڈیوٹی پر معمور پولیس پارٹی پر حملہ کردیا ، جس میں ایک دہشت گردہلاک اور ایک کانسٹیبل شہیدہوگیا۔
تفصیلات کے مطابق سینٹرل پولیس آفس سے جاری بیان میں کہا گیا ہے کہ جنوبی وزیرستان لوئر میں پولیس اسٹیشن اعظم ورسک کے علاقے کلوشہ میں نامعلوم دہشت گردوں نے پولیس پارٹی پر بھاری ہتھیاروں سے اس وقت حملہ کیا جب پولیس ٹیمیں علاقے میں انسداد پولیو ٹیموں کی سیکورٹی پر تعینات تھی۔
پولیس اور دہشت گردوں کے مابین 30منٹ تک جاری رہنے والے فائرںگ کے تبادلے میں ایک دہشت گر ہلاک جبکہ باقی فرار ہوگئے۔
پولیس نے کہا دہشت گردوں کے قبضے سے ایس ایم جی راکٹ لانچر اور دو موٹر سائیکل برامد ہوئی جبکہ ہلاک دہشتگرد کی شناخت افنان کے نام سے ہوئی، جس سے دو شناختی کارڈز تین اے ٹی ایم کارڈز اور موبائل فون برآمد ہوا۔
حکام کے مطابق ہلاک دہشت گرد کے قبضے سے بر آمد ہونے والے کارڈز شپید کانسٹیبل عمران کے تھے، جو عید سے قبل شہید ہوئے تھے، شہید عمران کانسٹیبل کا مقدمہ جنوبی وزیرستان تھانہ سی ٹی ڈی میں درج ہے۔
وزیراعظم کی جنوبی وزیرستان میں انسدادپولیو مہم پولیس سیکیورٹی ٹیم پر حملے کی مذمت کرتے ہوئے دہشت گرد حملے میں پولیس کانسٹیبل کی شہادت پر اظہار افسوس کیا۔
شہباز شریف کا کہنا تھا کہ انسداد پولیو مہم کے تحفظ پر مامور اہلکاروں پرحملہ کرنے والے انسانیت اور قوم کے دشمن ہیں، انسانیت کے دشمن دہشت گردوں کو کیفر کردار تک پہنچائیں گے، پولیو کے خلاف مہم جاری رکھی جائے گی، عوام سے اپیل ہے ایسے عناصر کے دباؤ میں نہ آئیں۔