آئندہ مالی سال کے لیے وفاقی بجٹ آج پیش کیا جا رہا ہے اس موقع پر ریڈ زون اور اطراف میں سیکیورٹی کے سخت ترین انتظامات کیے گئے ہیں۔
اے آر وائی نیوز کے مطابق اگلے مالی سال 26-2025 کے لیے وفاقی بجٹ آج شام پانچ بجے قومی اسمبلی میں پیش کیا جائے گا۔ وفاقی وزیر خزانہ محمد اورنگزیب بجٹ پیش کریں گے۔
وفاقی بجٹ کے موقع پر اسلاما ٓباد میں ریڈ زون اور اطراف میں سیکیورٹی کے سخت ترین انتظامات کیے گئے ہیں اور پولیس کی بھاری نفری پارلیمنٹ ہاؤس کے باہر تعینات ہے۔
اسلام آباد پولیس کے مطابق بجٹ کے موقع پر سیکیورٹی ڈویژن اور آپریشن ڈویژن کے 24 افسران اور اہلکار تعینات ہیں۔ ملازمین کے احتجاج کے پیشن نظر پاک سیکرٹیرٹ گیٹ پر بھی پولیس تعینات کر دی گئی ایس ایس پی سیکیورٹی اور ایس پی سٹی بھی سیکرٹیریٹ گیٹ پر موجود ہیں۔
واضح رہے کہ سرکاری ملازمین نے آج پارلیمنٹ ہاوس کے سامنے احتجاج کی کال دے رکھی ہے اور وہ پارلیمنٹ کی جانب بڑھنے کی کوشش کر رہے ہیں۔ تاہم آئی جی اسلام آباد کے مظاہرین سے مذاکرات جاری ہیں۔
تاہم سرکاری ملازمین کے سیکریٹریٹ سے پارلیمنٹ کی جانب مارچ جاری رکھے جانے کے باعث سیکریٹریٹ سے پارلیمنٹ ہاؤس تک روڈ خاردار تاریں لگا کر بند کر دیا گیا ہے جب کہ سیکریٹریٹ سے پارلیمنٹ تک 4 مختلف مقامات سے شاہراہ دستور بند ہے۔
ریڈ زون کے داخلی و خارجی راستے عارضی طور پر بند کر دیے گئے ہیں۔ اس کے علاوہ ایکسپریس چوک، نادرا چوک، ٹی کراس بری امام تا حکم ثانی بند کر دیا گیا ہے۔ شہری ریڈ زون کیلیے سرینہ ہوٹل، میریٹ ہوٹل، مارگلہ روڈ کا استعمال کر سکتے ہیں۔
https://urdu.arynews.tv/budget-2025-26-minister-finance-aurangzaib-economic-survey/