عوام صدر زرداری کے استعفے سے متعلق غلط خبروں سے ہوشیار رہیں، ندیم افضل چن

لاہور: پاکستان پیپلز پارٹی کے مرکزی سیکریٹری اطلاعات ندیم افضل چن نے صدر مملکت آصف علی زرداری کے استعفے کی خبروں کو بے بنیاد قرار دے دیا۔

ندیم افضل چن نے اپنے بیان میں واضح کیا کہ صدر مملکت آصف علی زرداری کے استعفیٰ کی خبریں بے بنیاد ہیں، ایسی افواہیں جمہوری اداروں کے استحکام کو نقصان پہنچانے کی کوشش ہے، وہ ہمیشہ جمہوریت کیلیے ثابت قدم رہے ہیں۔

مرکزی سیکریٹری اطلاعات نے کہا کہ عوام ان کے استعفے سے متعلق غلط خبروں سے ہوشیار رہیں، پیپلز پارٹی قوم کی بہتری اور جمہوری اقدار کے فروغ کیلیے انتھک محنت کرتی رہے گی۔

یہ بھی پڑھیں: صدرآصف زرداری کے استعفیٰ سے متعلق افواہیں، مرکزی ترجمان پیپلزپارٹی کا بیان آگیا

انہوں نے مزید کہا کہ آصف علی زرداری نے آمریت کا ڈٹ کر مقابلہ کیا اور اصولوں پر قائم رہے، پاکستان کی خاطر انہوں نے ہمیشہ آواز بلند کی ہے۔

گزشتہ روز رہنما پاکستان پیپلز پارٹی شازیہ مری نے صدر مملکت کے استعفیٰ سے متعلق افواہوں پر بیان میں کہا تھا کہ ان کے استعفیٰ کی افواہیں من گھڑت اور جھوٹ پر مبنی ہیں، پیپلز پارٹی اور آصف علی زرداری نے ثابت کیا کہ ہم کبھی میدان نہیں چھوڑتے، تاریخ گواہ ہے انہوں نے آمریت اور قید کا سامنا کیا لیکن پیچھے نہیں ہٹے۔

شازیہ مری نے کہا کہ پیپلز پارٹی کے اتحادیوں سے اچھے تعلقات ہیں، چاروں صوبائی اسمبلیوں، قومی اسمبلی اور سینیٹ میں دو تہائی اکثریت درکار ہے، اس لیے ایسے کسی سوال کا کوئی جواز نہیں، آصف علی زرداری وہ واحد سیاستدان ہیں جنہوں نے صدارتی اختیارات پارلیمان کو دیے، ان کی سیاسی بصیرت کی بدولت چاروں اکائیوں کو صوبائی خود مختاری ملی۔

ان کا کہنا تھا کہ جب ملک مشکلات میں آیا تو آصف علی زرداری ہی تھے جنہوں نے پاکستان کھپے کا نعرہ لگایا، حقوق بلوچستان ہو یا سوات میں امن کا قیام ان کی بدولت ہی ممکن ہوا، وہ ملک کے پہلے سویلین صدر ہوں گے جو اپنی 2 صدارتی مدتیں مکمل کریں گے۔