کراچی : ایم کیو ایم کے گرفتار کارکنان کے اہلخانہ کی جانب سے سندھ ہائی کورٹ میں دائر درخواست پر جسٹس احمد علی شیخ نے سماعت سے انکار کردیا۔
درخواست ایم کیو ایم کے لیگل ایڈ کمیٹی کی جانب سے دائر کی گئی تھی، جس میں مؤقف اپنایا گیا تھا کہ ایم کیو ایم کے مرکز نائن زیرو سے گرفتاردہشتگردی ایکٹ کے تحت بند کارکنوں کی اہل خانہ سے ان کی ملاقات کرائی جائے۔
جسٹس احمد علی شیخ کی جانب سے معذرت پر درخواست چیف جسٹس سندھ ہائی کورٹ کو بجھوادی گئی ہے تاکہ درخواست کو سماعت کیلئے کسی دوسرے بینچ میں بھیجی جائے۔
ایم کیو ایم کے مرکز سے گرفتار آٹھوں ملزمان کو انسدادِ دہشت گردی کی عدالت نے ریمانڈ پر پولیس کے حوالے کیا تھا۔
یاد رہے کہ رینجرز نے ایم کیو ایم کے مرکز نائن زیرو پر چھاپے کے دوران رابطہ کمیٹی کے رکن عامر خان سمیت 110 افراد کو گرفتار کیا تھا۔ رینجرز حکام نے ملزمان کو عدالت میں پیش کیا ۔
رینجرز نے عدالت سے استدعا کی کہ ملزمان نے اہم انکشافات کئے ہیں اور مزید پوچھ گچھ کیلئے ملزمان کو رینجرز کی تحویل میں دیا جائے ۔عدالت نے رینجرز کی استدعا منظور کرتے ہوئے تمام ملزمان کو90 روز کیلئے رینجرز کی تحویل میں دے دیا تھا۔،