ایف پی سی سی آئی کے صدر عاطف اکرام نے 19جولائی کی ہڑتال سے علیحدگی کا اعلان کر دیا۔
صدر عاطف اکرام نے کہا کہ ایف پی سی سی آئی 19 جولائی کی ہڑتال کی حمایت نہیں کرے گی اور وزیر خزانہ سے ملاقات کے بعد چیمبرز نے ہڑتال نہ کرنے کی یقین دہانی کرائی تھی۔
انہوں نے کہا کہ حکومت نے مطالبات ماننے کی یقین دہانی کرائی ہے تو ہڑتال کا جواز نہیں بنتا جب حکومت سے مذاکرات جاری ہیں تو ہڑتال کی حمایت نہیں کی جا سکتی۔
صدرکراچی چیمبر جاوید بلوانی کی جانب سے بیان میں کہا گیا ہے کہ ملک گیر شٹرڈاؤن ہڑتال 19 جولائی کو شیڈول کے مطابق ہوگی، ہڑتال ملتوی یا منسوخ نہیں ہوگی۔
جاویدبلوانی کا کہنا تھا کہ ملتوی یا منسوخی کا فیصلہ چاروں صوبوں کے چیمبرز کی مشاورت سے ہوگا، افواہیں پھیلانےوالےکاروباری برادری کےخیرخواہ نہیں۔
انھوں نے کہا کہ تاجر،دکانداراورصنعت کار سب ہڑتال میں اپنا بھرپور کردار ادا کریں۔
یاد رہے گذشتہ روز صدر ایف پی سی سی آئی نے ایف بی آر اختیارات کیخلاف 19 جولائی ہڑتال نہ کرنے کا اعلان کیا تھا۔
عاطف اکرم کا کہنا تھا کہ 19 جولائی کو ہڑتال نہیں کی جائےگی، کراچی چیمبر کے علاوہ تمام ایسوسی ایشنز ہڑتال مؤخر کرنے کے حق میں ہیں۔
خیال رہے تاجروں کی 19جولائی کی ہڑتال کی کال کے پیش نظر آج وزیرخزانہ نے چیمبرز اور تاجر رہنماؤں کو دارالحکومت اسلام آباد بلایا تھا، تاجر قیادت اور وزیرخزانہ محمد اورنگزیب کے درمیان ملاقات ہوئی۔
وزیرخزانہ سے ملاقات کے حوالے سے صدر لاہور چیمبر کا کہنا تھا کہ حکومت کو واضح پیغام دیں گے، ایف بی آر کے اختیارات ناقابل قبول ہیں۔