انٹرنیشنل کرکٹ کونسل (آئی سی سی) کا اجلاس سنگاپور میں شروع ہوچکا ہے اور کل بورڈ میٹنگ میں کئی اہم فیصلے کیے جائیں گے۔
آئی سی سی کا سالانہ اجلاس سنگاپور میں جاری ہے جس میں ممبر ممالک کے درمیان آئی سی سی ورکنگ گروپ کی تشکیل کے حوالے سے گفت وشنید جاری ہے۔
آئی سی سی کی بورڈ میٹنگ کل (ہفتہ) سے شروع ہوگی۔ اس میٹنگ میں مستقبل میں کرکٹ کے حوالے سے کئی اہم فیصلے متوقع ہیں۔
اس اجلاس میں لاس اینجلس اولمپکس 2028 میں کرکٹ ٹیموں کی شمولیت کے حوالے سے لائحہ عمل طے کیا جائے گا کہ اس میں کون سی ٹیمیں شرکت کریں گی۔
میڈیا رپورٹ کے مطابق میزبان ہونے کے ناتے امریکا کو براہِ راست کوالیفائی کرنے کی جگہ مل سکتی ہے جب کہ رینکنگ کے لیے ٹیموں کو ڈیڈ لائن دیے جانے کا بھی امکان ہے۔
اجلاس میں آئی سی سی کا ورککنگ گروپ تشکیل دیا جائے گا۔ یہ ورکنگ گروپ ٹیسٹ کرکٹ کی دو درجاتی تقسیم پر سفارشات دے گا۔ جس کا اطلاق اگلے ورلڈ ٹیسٹ چیمپئن شپ سائیکل سے ہو سکتا ہے۔
اس کے علاوہ 2026 میں شیڈول ٹی 20 ورلڈ کپ کے بعد اس میگا ایونٹ میں ٹیموں کی تعداد 20 سے بڑھا کر 24 کرنے پر بھی تبادلہ خیال ہوگا۔
ذرائع کا کہنا ہے کہ کچھ کرکٹ بورڈز 13 ممالک پر مشتمل ون ڈے سپر لیگ کی بحالی کے حق میں ہیں۔ اس لیے اجلاس میں ون ڈے سپر لیگ کی بحالی پر بھی گفتگو متوقع ہے۔
https://urdu.arynews.tv/olympics-2028-procedure-for-inclusion-of-cricket-teams/