واشنگٹن(19 جولائی 2025): وزیرخزانہ محمد اورنگزیب کا کہنا ہے کہ پاکستان اور امریکا کے درمیان تجارتی تعلقات میں مزید بہتری کے امکانات روشن ہیں۔
تفصیلات کے مطابق وزیر خزانہ محمد اورنگزیب کی سربراہی میں پاکستانی وفد نے دورہ واشنگٹن کیا، وزیرخزانہ نے اس دوران امریکی وزیرخزانہ، تجارتی نمائندے یوایس ٹی آر سے ملاقات کی۔
ملاقاتی اعلامیے کے مطابق پاک امریکا تجارتی تعلقات اور سرمایہ کاری میں فروغ کے عزم کا اعادہ کیا گیا، پاکستانی وفد نے امریکی سیکریٹری کامرس سے بھی ملاقات کی۔
وزیرخزانہ کی سربراہی میں امریکی تجارتی نمائندے جیمیسن گریئر سے بھی ملاقات ہوئی، جہاں دونوں نے تجارت اور معاشی تعلقات کو دوطرفہ تعلقات کا اہم ستون قرار دیا۔
وزیرخزانہ نے کہا ہے امریکاپاکستان کا سب سے بڑا تجارتی شراکت دارہے، پاکستان روایتی اور غیر روایتی شعبہ جات میں تعاون کو فروغ دینا چاہتا ہے، پاکستان آئی ٹی، معدنیات، زراعت اور دیگر شعبوں کو وسعت دینےکا خواہشمند ہے۔
محمد اورنگزیب کا کہنا تھا کہ پاکستان چاہتا ہے دونوں ممالک کے درمیان باہمی فائدہ مند تعلق قائم ہو، تجارتی مذاکرات مثبت نتیجے پر جانے سے دونوں ملکوں کی معیشت کو فائدہ ہوگا۔
وزیرخزانہ کا کہنا تھا کہ پاکستان اور امریکا کے درمیان تجارتی تعلقات میں مزید بہتری کے امکانات روشن ہوگئے ہیں، وزیر خزانہ محمد اورنگزیب کا کہنا ہے امریکی وزیرِتجارت کے ساتھ بات چیت مثبت رہی۔
انہوں نے کہا کہ سرمایہ کاری، کرپٹو، بلاک چین، معدنیات اور زراعت سمیت مختلف شعبوں میں تعاون پر بات ہوئی ہے، جو دونوں ممالک کے لیے ترقی کے نئے راستے کھول سکتی ہے۔
وزیر خزانہ محمد اورنگزیب نے مزید کہا کہ دونوں ممالک کے درمیان تجارت کے شعبے میں پیشرفت جاری ہے۔ پاکستان امریکا کے ساتھ باہمی تجارت کو مزید فروغ دینا چاہتا ہے۔