اسلام آباد : ملک بھر میں شدید بارشوں کے پیش نظر عوام کو غیر ضروری سفر سے گریز کی ہدایات جاری کردی گئیں۔
تفصیلات کے مطابق شدید بارشوں کے پیش نظر عوام کے لئے انتباہ جاری کیا گیا ، جس میں غیر ضروری سفر سے گریز کی اپیل کی گئی ہے۔
انتباہ میں کہا گیا کہ محکمہ موسمیات نےملک بھرمیں مون سون کی شدید بارشوں کی پیشگوئی کررکھی ہے، ٹریفک حادثات،لینڈ سلائیڈنگ،درختوں کاگرنا ،ندی نالوں میں طغیانی کاخطرہ ہے۔
انتباہ میں کہنا تھا کہ سیاح بارشوں کےدوران غیر ضروری سفر،سیاحتی مقامات پر جانے سے گریزکریں اور بارشوں کے دوران دریاؤں اورندی نالوں کے قریب نہ جائیں۔
الرٹ کے مطابق موسلادھار بارش نقل و حمل کے نیٹ ورکس میں خلل کا باعث بن سکتی ہے، سیاح ضروری احتیاطی تدابیر اور موسمی حالات سے باخبر رہیں اور کسی بھی ممکنہ صورتحال پر انتظامیہ کی ہدایات پرعمل کریں۔
مزید پڑھیں : گلگت بلتستان میں سیلاب میں لاپتا سیاحوں کے لیے سرچ آپریشن جاری، 5 افراد کی لاشیں مل گئیں
عوام کا تحفظ یقینی بنانے کیلئے تمام ریسکیو اداروں کو ہائی الرٹ کر دیا گیا۔
دوسری جانب محکمہ سیاحت نے گلیات، کمراٹ، کالاش سمیت سیاحتی مقامات پر الرٹ جاری کر دیا، جس میں محکمہ سیاحت کے عملے کی تمام چھٹیاں منسوخ کرکے فوری واپسی کے احکامات جاری کئے ہیں۔
ریسکیو 1122 اور ضلعی انتظامیہ کو ہر قسم کےحالات سےنمٹنے کیلئے تیار رہنے کی ہدایت کی گئی ہے۔