اداکار سمیع خان نے اداکارہ علیزے شاہ اور منسا ملک کے درمیان ہونے والی لڑائی کی کہانی بیان کردی۔
اداکارہ علیزے شاہ اور منسا ملک کے درمیان لڑائی کی خبریں سوشل میڈیا کی زینت بنی ہوئی ہیں اب ڈرامے کے مرکزی کردار سمیع خان نے بھی ذکر کیا ہے۔
گزشتہ دنوں علیزے شاہ نے اپنے ساتھ پیش آئے واقعے کو سوشل میڈیا پر کھل کر بیان کیا اور پورا قصہ بتایا کہ ڈرامے کے سیٹ پر منسا ملک نے پہلے انہیں تھپڑ مارا جس کے جواب میں انہوں نے بھی چپل دے ماری لیکن منسا ملک نے سوشل میڈیا پر مجھے ہی تنقید کانشانہ بنایا جس سے ناصرف میرا کام بلکہ زندگی بھی متاثر ہوئی۔
یہ پڑھیں: شازیہ منظور نے ریمپ پر جان بوجھ کر دھکا دیا، علیزے شاہ
تاہم اب ایک پروگرام میں سمیع خان نے اداکاراؤں کے نام لیے بغیر ان کے درمیان ہونے والی لڑائی کی حقیقت بتاتے ہوئے کہا کہ وہ میک روم میں بیٹھے فون کال پر اپنا ضروری کام کررہے تھے کہ ایک اداکارہ آئی اور مجھے کہنے لگی کہ میں نے کردیا، جو مجھے سمجھ نہیں آیا لیکن اتنی ہی دیر میں دوسری اداکارہ اندر داخل ہوئی، دونوں کے درمیان لفظی تکرار ہوئی اورپھر چپل اٹھا کر پھینکی گئی جو دیوار پر جا لگی۔
انہوں نے کہا کہ میں ضروری کال پر تھا تو اٹھ کر باہر چلا گیا اور پھر فری ہونے کے بعد پورا ماجرا پوچھا۔
اداکار نے مزید کہا کہ سیٹ پر کسی کو بھی ہاتھ اٹھانے کی اجازت نہیں ہے، اگر کوئی مسئلہ تھا تو ڈائریکٹر سے بات کرنی چاہیے تھی لیکن اچھی بات یہ ہے کہ جس اداکار کے ساتھ زیادتی ہوئی تھی اس نے اپنے ڈرامے کی شوٹنگ کا کام مکمل کیا۔