شوبز انڈسٹری کے اداکار احمد حسن نے انکشاف کیا ہے کہ وہ روز رات کو اہلیہ نوشین احمد کے پاؤں دبا کر سوتے ہیں۔
اداکار احمد حسن نے اہلیہ و اداکارہ نوشین احمد کے ساتھ نجی ٹی وی کے مزاحیہ شو میں شرکت کی اور اس دوران مختلف موضوعات پر اظہار خیال کیا۔
انہوں نے بتایا کہ میرا روز کا معمول ہے کہ سونے سے پہلے بیوی کے پاؤں دبا کر سوتا ہوں اس سے اس کو سکون اور مجھے برکت ملتی ہے۔
اداکار نے کہا کہ میں ایک فرمابردار شوہر ہوں اور بیوی سے بھی انہوں نے بیان کی گواہی طلب کی تو انہوں نے کہا کہ ظاہر ہے وہ میرے شوہر ہیں ایسا کرسکتے ہیں۔‘
احمد حسن نے کہا کہ کسی بھی تقریب میں جانے سے پہلے تیار ہونے میں زیادہ وقت وہی لیتے ہیں، کیونکہ وہ اس وقت تک تیار ہونا شروع نہیں کرتے جب تک ان کی بیوی تقریباً تیار نہ ہو جائیں۔
ان کا یہ بھی کہنا تھا کہ حال ہی میں انہوں نے ایک ڈرامے کی ہدایتکاری کی، جس میں ان کی بیوی نے بطور اداکارہ کام کیا، چونکہ ڈرامے میں سینئر اداکار بھی شامل تھے، تو کسی کو یہ محسوس نہ ہو کہ وہ اپنی بیوی کی طرف داری کر رہے ہیں، اس لیے وہ کبھی کبھار انہیں ڈانٹ بھی دیا کرتے تھے، تاہم فطری طور پر وہ ان سے نرمی سے پیش آتے تھے۔
واضح رہے کہ احمد اور نوشین کی شادی 12 سال قبل ہوئی اور دونوں کی پہلی ملاقات ڈرامے کے سیٹ پر ہوئی تھی جس کے بعد انہوں نے شادی کرلی۔