اسلام آباد (29 جولائی 2025): ملکی دارالحکومت میں 50 زندہ گدھے اور 25 من گوشت برآمد ہونے کے کیس میں پولیس کی تحقیقات جاری ہیں۔
پولیس حکام نے بتایا کہ اسلام آباد میں گدھے کے گوشت کی سپلائی کے شواہد نہیں ملے، گودام کے مالک کو ٹیکسلا سے گرفتار کیا گیا ہے۔
انہوں نے بتایا کہ گودام مالک نے کرایہ نامہ کی ایس او پی کی خلاف ورزی بھی کی، گودام میں 17 روز کے دوران فیصل آباد سے 60 گدھے لائے گئے تھے۔
یہ بھی پڑھیں: کہیں آپ گدھے کا گوشت تو نہیں کھا رہے؟ پہچان کا آسان طریقہ
گزشتہ روز اسلام آباد میں گدھے کے گوشت کی فروخت کے معاملے پر فوڈ سکیورٹی حکام کی مدعیت میں تھانہ سنگجانی میں مقدمہ درج کر لیا گیا۔
ایف آئی آر میں کہا گیا کہ فوڈ اتھارٹی ٹیم کی نشاندہی پر ترنول چھاپے کے دوران گدھے کا 1ہزار کلو گوشت برآمد ہوا اور غیر ملکی ملازم گوشت کے حوالے سے ریکارڈ یا کوئی واضح جواب نہ دے سکا۔
ثبوت و شواہد کے ساتھ قانونی کارروائی شروع کر دی گئی ہے اور انتظامیہ نے تحقیقاتی کمیٹی تشکیل دے دی ہے، 3 رکنی کمیٹی گوشت کی خریدوفروخت اور سپلائی کے حوالے سے تحقیقات کرے گی۔
گوشت کے ملنے والے نمونے تجزیے کیلیے لیبارٹری بھجوا دیئے گئے۔
اس سے قبل گدھے کا گوشت برآمد ہونے کا معاملے پر مزید انکشافات سامنے آئے تھے کہ کھالیں گوادر لے جا کر بیرون ملک ایکسپورٹ کی جاتی تھیں، موقع سے گرفتار ہونے والے غیر ملکی کے پاس 90 دن کا ویزا ہے اور گرفتار غیر ملکی باشندہ زونگ وی حال ہی میں پاکستان آیا ہے۔
پنجاب کے مختلف علاقوں سے پاکستانی یہاں گدھے فروخت کرتے تھے، موقع سے پاکستانی تمام افراد فرار ہو گئے تھے۔