کراچی: وزیراعلیٰ سندھ مراد علی شاہ نے یومِ آزادی شایان شان طریقے سے منانے کا پلان بتاتے ہوئے گاڑی، دکان یا عمارت کی بہترین سجاوٹ پر انعام دینے کا اعلان کردیا۔
تفصیلات کے مطابق وزیراعلیٰ سندھ سید مراد علی شاہ نے یومِ آزادی کو اس سال "ماضی سے زیادہ شایانِ شان انداز میں” منانے کے لیے 14 روزہ تقریبات کا تفصیلی شیڈول جاری کر دیا ہے۔
پریس کانفرنس سے خطاب کرتے ہوئے وزیراعلیٰ نے کہا کہ یوم آزادی کی تقریبات یکم اگست سے شروع ہوں گی اور 14 اگست تک جاری رہیں گی، جنہیں وفاقی حکومت کی ہدایات کے مطابق ترتیب دیا گیا ہے۔
انہوں نے کہا "یہ جشن صرف 14 اگست تک محدود نہیں بلکہ ہم مئی میں حاصل کی گئی کامیابیوں کو بھی یادگار انداز میں منائیں گے۔”
مراد علی شاہ نے بتایا کہ حکومت سندھ کی جانب سے مختلف ثقافتی اور موسیقی تقاریب کا اہتمام کیا گیا ہے، 13 اگست کی شب کراچی کے نیشنل اسٹیڈیم میں معروف پاکستانی فنکاروں کے ساتھ ایک شاندار کنسرٹ ہوگا، جبکہ 8 اگست کو رانی باغ حیدرآباد اور 10 اگست کو سکھر میں بھی میوزیکل شوز منعقد کیے جائیں گے۔
ان کا مزید کہنا تھا کہ محکمہ ثقافت سی ویو پر ایک خصوصی تھیم فلوٹ پیش کرے گا، جبکہ یکم تا 14 اگست صوبے بھر میں 160 سے زائد کھیلوں کے مقابلے منعقد ہوں گے۔ ان مقابلوں میں "سندھ الیون” اور "میئر الیون” کے درمیان ایک دوستانہ کرکٹ میچ بھی شامل ہے جو برہانی اسٹیڈیم میں کھیلا جائے گا۔
اس سال تقریبات کا تھیم "معرکہ حق” رکھا گیا ہے، جس کے تحت قومی جذبے اور کامیابیوں کو اجاگر کیا جائے گا، خاص طور پر حکومت کا معاشی بحالی پروگرام "اُڑان پاکستان”۔
وزیراعلیٰ سندھ نے کہا کہ حسب روایت 14 اگست کو مزار قائد پر خراج تحسین پیش کیا جائے گا، اس کے ساتھ ساتھ مختلف اضلاع میں پرچم کشائی، ریلیاں، اور عمارتوں، گھروں، دفاتر و گاڑیوں کو سجانے کے مقابلے منعقد ہوں گے، جن میں گھر،سرکاری عمارت،گاڑی کی بہترین سجاوٹ کرنے والے کو انعام ملے گا۔
اس کے علاوہ 9 اگست کو کشتی رانی کا مقابلہ ہوگا، جبکہ کراچی میٹروپولیٹن کارپوریشن کی جانب سے جہانگیر کوٹہاری پریڈ پر آتش بازی اور میوزیکل شو کا انعقاد کیا جائے گا۔
وزیراعلیٰ نے کہا کہ وہ چاہتے ہیں کہ کراچی کی تقریبات ملک بھر میں سب سے نمایاں ہوں، اور اس مقصد میں کاروباری برادری بھی بھرپور تعاون کر رہی ہے۔
11 اگست کو "یومِ اقلیت” کے طور پر منایا جائے گا جبکہ معذور افراد کے لیے ایک خصوصی میلہ بھی لگایا جائے گا جس میں وزیراعلیٰ خود شرکت کریں گے۔
"مائی کراچی” ایونٹ کا آغاز بھی ان دنوں میں ہوگا، جس میں سندھ حکومت بھرپور شرکت کرے گی۔ آرٹسٹوں کو حب الوطنی پر مبنی فن پارے بنانے کی ترغیب دی جائے گی اور قومی نغمہ مقابلہ بھی منعقد ہوگا، اس کے علاوہ ایک وسیع میدان میں انسانی پرچم کی شکل بنانے کا بھی منصوبہ ہے۔
حکومت سندھ کی کوشش ہے کہ اگست کے ان 14 دنوں کو مکمل جوش و جذبے اور عوامی شمولیت کے ساتھ منایا جائے۔