پشاور ہائیکورٹ نے پی ٹی آئی سینیٹر اعظم سواتی کا نام ای سی ایل سے نکالنے کا حکم دے دیا۔
تفصیلات کے مطابق عدالت نے اعظم سواتی کا نام ای سی ایل سے نکالنے کی درخواست پر محفوظ فیصلہ سناتے ہوئے حکم دیا ہے کہ اعظم سواتی 5کروڑ کے بانڈ جمع کروائیں۔
عدالت نے ہدایت کی کہ 5کروڑ روپے کے مچلکے جمع کرانے پر نام ای سی ایل سے نکالا جائے۔
واضح رہے کہ چند روز قبل پشاور ہائیکورٹ نے کوہستان کرپشن اسکینڈل میں ملوث محمد ایوب کی پلی بارگین درخواست پر سماعت کرتے ہوئے نیب کو اس معاملے پر غور کرنے کی ہدایت کی تھی۔
جسٹس صاحبزادہ اسداللہ اور جسٹس ڈاکٹر خورشید اقبال پر مشتمل بینچ نے سماعت کی تھی۔ عدالت میں ڈپٹی پراسیکیوٹر جنرل نیب محمد علی اور اسپیشل پراسیکیوٹر نیب ارباب کلیم اللہ پیش ہوئے۔ درخواست گزار کے وکیل بیرسٹر شعیب رزاق نے عدالت کو بتایا کہ ان کا موکل نیب کے ساتھ پلی بارگین کرنا چاہتا ہے۔
وکیل درخواست گزار نے عدالت سے درخواست کی کہ وہ نیب کو پلی بارگین شروع کرنے کی ہدایت کرے۔ تاہم جسٹس صاحبزادہ اسداللہ نے واضح کیا کہ ’’یہ ہمارا کام نہیں ہے، یہ نیب اور آپ کا آپس کا معاملہ ہے۔ پلی بارگین کے لیے ہم نیب کو کیسے ہدایت دے سکتے ہیں؟ کوئی قانون دکھائیں۔‘‘
ڈپٹی پراسیکیوٹر جنرل نیب محمد علی نے عدالت کو بتایا تھا کہ درخواست گزار پر کوہستان کرپشن اسکینڈل میں تین ارب 40 کروڑ روپے کی کرپشن کا الزام ہے۔ انہوں نے کہا تھا کہ ’’اس نے پہلے ایبٹ آباد ہائیکورٹ اور پھر اسلام آباد ہائیکورٹ میں عبوری ضمانت کے لیے درخواستیں دائر کی تھیں جو خارج ہوئی تھیں۔‘‘