کراچی (3 اگست 2025): کل بروز پیر کراچی کے مختلف علاقوں کو پانی کی فراہمی میں کمی کا سامنا کرنا پڑ سکتا ہے۔
کراچی واٹر اینڈ سیوریج کارپوریشن نے بتایا کہ کل 4 اگست کو کے-الیکٹرک کی جانب سے بن قاسم کلسٹر دھابیجی سب اسٹیشن اور گرڈ اسٹیشن پر مینٹیننس کا کام جائے گا۔
ترجمان کارپوریشن نے بتایا کہ مینٹیننس کا کام صبح 10 سے شام 7 بجے تک جاری رہے گا، کے-الیکٹرک کی جانب سے شٹ ڈاؤن کا دورانیہ مجموعی طور پر 9 گھنٹے ہوگا۔
یہ بھی پڑھیں: حب سے کراچی بڑے پیمانے پر پانی کی غیر قانونی ترسیل کا انکشاف
انہوں نے بتایا کہ دھابیجی پمپنگ اسٹیشن کے مختلف فیڈرز پر بجلی کی فراہمی جزوی طور پر معطل رہے گی۔
واٹر اینڈ سیوریج کارپوریشن کے مطابق مینٹیننس کے کام کے باعث شہر کو پانی کی فراہمی میں 100 ملین گیلن کی کمی متوقع ہے، لانڈھی، کورنگی، شاہ فیصل، بن قاسم، ڈی ایچ اے اور نارتھ ناظم آباد میں پانی کی فراہمی میں کمی ہوگی۔
29 جولائی کو کے-الیکٹرک کی جانب سے دھابیجی سب اور گرڈ اسٹیشن پر مین ٹیننس کے کام کا آغاز کیا گیا تھا۔ ترجمان کراچی واٹر اینڈ سیوریج کارپوریشن نے بتایا تھا کہ دھابیجی گرڈ اسٹیشن پر مین ٹیننس کے کام کا آغاز کر دیا گیا، کے-الیکٹرک کی جانب سے شٹ ڈاؤن کا دورانیہ مجموعی طور پر 9 گھنٹے ہوگا، پمپنگ اسٹیشن کے مختلف فیڈرز پر بجلی کی فراہمی جزوی طور پر معطل ہے۔
انہوں نے بتایا تھا کہ مین ٹیننس کے کام کے باعث پانی کی فراہمی میں 85 ملین گیلن کی کمی متوقع ہے، لانڈھی، کورنگی، شاہ فیصل، بن قاسم، ڈی ایچ اے اور نارتھ ناظم آباد کو پانی کی فراہمی میں کمی ہوگی۔
اس سے ایک روز ترجمان واٹر اینڈ سیوریج کارپوریشن نے بتایا تھا کہ کے-الیکٹرک کا حب پمپنگ اسٹیشن پر بجلی کے بریک ڈاؤن صبح 7 بج کر 30 منٹ پر پیش آیا جس کے باعث حب رائزنگ مین نمبر دو متاثر ہوگئی۔