عازمین حج سے واجبات کی وصولی کا آج سے آغاز

عازمین حج سے پیر 4 اگست سے حج واجبات کی وصولی کا آغاز ہو گا۔

وزارت مذہبی امور کے مطابق نامزد بینکوں اور آن لائن پورٹل کے ذریعے حج درخواستیں جمع کرانے کی سہولت فراہم کی گئی ہے۔ پہلے آئیے پہلےپ ائیےکی بنیاد پر رجسٹرڈ افراد سے پہلی قسط 4 تا 9 اگست وصول کی جائے گی۔

نشستیں دستیاب ہونے پر 11تا 16 اگست نئے عازمین حج بھی اپلائی کرسکیں گے۔

وزارت کا کہنا ہے کہ نشستیں مکمل ہوتے ہی حج واجبات کی وصولی روک دی جائے گی، حج پیکج 2026 ساڑھے 11 تا ساڑھے 12لاکھ کے درمیان ہو گا اور دوسری قسط یکم نومبر سے وصول کی جائے گی۔

دوبارہ حج کرنے اور عمر کی بالائی حد کی پابندی ختم کی گئی ہے۔ یکم مارچ 2014 کے بعد پیدا ہونے والے بچے اپلائی نہیں کر سکتے۔

ذرائع کے مطابق ساڑھے 4 لاکھ رجسٹرڈ عازمین سے سوا لاکھ کا حج کوٹہ مکمل نہ ہونے کا خدشہ ہے، رجسٹرڈ عازمین سے حج درخواستیں 4 اگست سے وصول کی جائیں گی رجسٹرڈ عازمین سرکاری اسکیم کے تحت درخواستیں 4 تا 9 اگست تک جمع کرواسکتے ہیں۔

ذرائع کا کہنا ہے کہ غیر رجسٹرڈ عازمین کی درخواستوں کی وصولی 11 سے 16 اگست تک ہوگی، درخواستیں پہلے آئیے پہلے پائیےکی بنیاد پر وصول کی جائیں گی، حج درخواستوں کے لیے پہلے رجسٹرڈ عازمین کو ترجیح دی جائے گی۔

ذرائع کے مطابق 38 سے 42 روزہ حج کے لیے 5 لاکھ روپے جمع کروانا ہوں گے جبکہ 20 سے 25 روزہ مختصر حج کی پہلی قسط کے طور پر ساڑھے پانچ لاکھ روپےجمع کروانا ہونگے۔

ذرائع کا اس حوالے سے مزید کہنا ہے کہ حج درخواستیں ملک کے 14 نامزد بینکوں میں جمع کرائی جاسکتی ہیں، حج اخراجات کی دوسری قسط یکم نومبر کو وصول کی جائے گی۔