اتھلیٹ ارشد ندیم ڈائمنڈ لیگ سے باہر ہو گئے

پاکستان کی تاریخ کے پہلے انفرادی اولمپک گولڈ میڈلسٹ اتھلیٹ ارشد ندیم کو ایکشن میں دیکھنے والے شائقین کے لیے مایوس کن خبر ہے کہ وہ ڈائمنڈ لیگ سے باہر ہو گئے ہیں۔

تفصیلات کے مطابق پاکستان کے جیولن تھرو چیمپئن ارشد ندیم فٹنس مسائل کی وجہ سے ڈائمنڈ لیگ سے باہر ہو گئے ہیں، ان کے ڈاکٹر نے انھیں ڈائمنڈ لیگ میں حصہ لینے سے منع کر دیا ہے۔

ارشد ندیم کا بحالی پروگرام انگلینڈ میں جاری ہے، انھوں نے اپنی ٹانگ پر وزن ڈالنا شروع کر دیا ہے، ڈاکٹر علی شیر باجوہ کے مطابق ارشد ندیم کی انجری نئی اور انتہائی سنجیدہ نوعیت کی ہے۔

یاد رہے کہ ارشد ندیم کی سرجری کیمبرج انگلینڈ میں کی گئی تھی، اور اب ورلڈ اتھلیٹکس میں شرکت ان کی بحالی مکمل ہونے پر مشروط ہے، بحالی پروگرام مکمل ہونے کے بعد ہی ورلڈ چیمپئن شپ میں ان کی شرکت کا فیصلہ کیا جائے گا۔

اولمپیئن ارشد ندیم کی لندن میں کامیاب سرجری

ارشد ندیم لندن میں گزشتہ ماہ پنڈلی کے آپریشن کے بعد اس وقت بحالی کے عمل سے گزر رہے ہیں، اور امید ہے کہ وہ ستمبر میں جاپان میں ہونے والی ٹوکیو ورلڈ ایتھلیٹک چیمپئن شپ سے قبل مکمل طور پر فٹ ہو جائیں گے، 29 جولائی کو مانچسٹر میں میڈیا سے گفتگو کرتے ہوئے انھوں نے کہا تھا کہ ان کی 4 سرجریز ہوئی ہیں، اور اب ری ہیب چل رہا ہے۔

خیال رہے کہ ڈائمنڈ لیگ کے مقابلے پولینڈ میں 16 اگست اور سوئزلینڈ میں 27 سے 28 اگست کو شیڈول ہیں۔