بالی ووڈ کی خوبرو اداکارہ تمنا بھاٹیا نے انکشاف کیا ہے کہ وہ کیل مہاسوں کے علاج کے لیے صبح اٹھ کر اپنا ہی تھوک استعمال کرتی ہیں۔
بھارتی میڈیا کو دیے گئے حالیہ انٹرویو میں تمنا بھاٹیا سے جلد سے متعلق سوال کیا گیا تو اداکارہ نے بغیر ہچکچائے کہا کہ اپنا تھوک لگائیں۔
انہوں نے کہا کہ دانوں کے علاج کے لیے آپ کا صبح کا تھوک (برش کرنے سے بھی پہلے منہ میں آنے والا لعاب) کام کرتا ہے اور یہ بات سائنس بھی تسلیم کرتی ہے۔
اداکارہ نے کہا کہ اگرچہ میں ڈاکٹر نہیں ہوں لیکن یہ میرا ذاتی طور پر کیا گیا تجربہ ہے اور مجھے یقین ہے کہ اس کے پیچھے کوئی سائنس ضرور ہے کیونکہ جب آپ صبح اٹھتے ہیں تو آپ کا جسم رات بھر کے دوران منہ میں کافی اینٹی بیکٹیرل عناصر پیدا کرچکا ہوتا ہے۔
تمنا نے مزید کہا کہ آپ کا جسم بیکٹیریا کے خلاف راتوں رات دفاع کرتا ہے، نتیجتاً صبح سویرے ہماری آنکھوں میں لیس دار سیال موجود ہوتا ہے، ہماری ناک بھری ہوئی ہوتی ہے، حتیٰ کہ ہمارے منہ میں اینٹی بیکٹیریل خصوصیات موجود ہوتی ہیں، اگر آپ صبح کے وقت اس تھوک کو استعمال کرتے ہیں تو یہ فوری طور پر آپ کے پمپلوں کو خشک کر دے گا۔
واضح رہے کہ تمنا بھاٹیا کے اس دعوے کی تصدیق سائنسی طریقے سے بھی ہوئی ہے۔
جرنل آف کاسمیٹک ڈرماٹولوجی میں شائع ہونے والی ایک تحقیق کے مطابق انسانی لعاب میں جراثیم کش مرکبات موجود ہوتے ہیں جو مہاسے پیدا کرنے والے بیکٹیریا کو مارنے کی صلاحیت رکھتے ہیں۔