اسلام آباد (6 اگست 2025): جو شہری بینظیر انکم سپورٹ پروگرام کے ڈائنامک سروے میں اندراج کروانا چاہتے ہیں لیکن طریقہ کار سے ناواقف ہیں تو یہ تحریر ان کیلیے مددگار ثابت ہوگی۔
بینظیر انکم سپورٹ پروگرام کے ڈائنامک سروے میں اندراج کا طریقہ کار انتہائی آسان ہے۔ سب سے پہلے بی آئی ایس پی آفس میں ڈائنامک رجسٹریشن ڈیسک پر تشریف لے جائیں اور وہاں موجود عملے کو اپنا شناختی کارڈ اور بچوں کا ب فارم مہیا کریں۔
عملہ آپ کو نئے سروے یا اپڈیٹ سروے کا ٹوکن جاری کرے گا، اس کے بعد ٹوکن نمبر کے مطابق رجسٹریشن روم میں سروے کیلیے تشریف لے جائیں جہاں ڈیٹا انٹری آپریٹر آپ سے سماجی و معاشی معلومات پر مشتمل سوالات پوچھے گا۔
یہ بھی پڑھیں: بینظیر انکم سپورٹ پروگرام کے وظائف میں کٹوتی کی شکایت کیسے درج کروائیں؟
فارم مکمل ہونے کے بعد تصدیق کیلیے اقرار نامہ پر انگوٹھا لگوایا جائے گا، اس کے بعد 8171 سے سروے کا تصدیقی میسج موصول ہوگا۔ جانچ پڑتال کے بعد مستحق گھرانوں کو 8171 سے اہلیت کا پیغام موصول ہوگا۔
رجسٹریشن کے عمل سے پہلے ضروری ہدایات:
بینظیر انکم سپورٹ پروگرام کی جانب سے 8171 سے میسج ملنے کے بعد بتائی گئی تاریخ کو بینظیر انکم سپورٹ پروگرام کے تحصیل دفتر میں رجسٹریشن سنٹر پر تشریف لے جائیں۔
اس کے علاوہ وہ گھرانے جو ابھی تک سروے کا حصہ نہیں بنے وہ بھی تشریف لا سکتے ہیں۔ سنٹر پر آتے ہوئے اپنے ساتھ بچوں کا نادرا ب فارم ضرور ساتھ لائیں۔
اہم نوٹ:
رجسٹریشن کرواتے وقت بجلی کا حالیہ بل ہمراہ لائیں اور اپنا زیر استعمال موبائل نمبر ہی درج کروائیں۔