اسلام آباد پولیس نے شہریوں کی آسانی کیلئے ون انفو ایپ متعارف کروا دی ہے، شہری کسی بھی ایمرجنسی کی صورت میں 15 کے علاوہ اس ایپ سے بھی پولیس کی فوری مدد حاصل کر سکتے ہیں۔
اس حوالے سے اے آر وائی نیوز کے پروگرام باخبر سویرا میں ڈی جی سیف سٹی اسلام آباد شاکر حسین داوڑ نے ناظرین کو ایپ کی خصوصیات اور اس کی اہمیت سے آگاہ کیا۔
انہوں نے بتایا کہ اسلام آباد پولیس شہریوں کو تحفظ فراہم کرنے کیلئے کوشاں ہے، ہماری ون انفو ایپ پولیس کی فوری مدد حاصل کرنے میں عوام کیلیے انتہائی مددگار ہے، اسے گوگل یا ایپل ایپ اسٹور سے باآسانی ڈاؤنلوڈ کیا جاسکتا ہے۔
شاکر حسین داوڑ کا کہنا تھا کہ اس کے اندر آپ کو سبز اور لال رنگ کے دو بٹن نظر آئیں گے سبز بٹن پُش کرکے آپ کوئی بھی مشکوک یا کرمنل قسم کی ایکٹویٹی جو آپنے دیکھی ہو اسے بیان کرسکتے ہیں۔
اس کے علاوہ لال بٹن دبانے سے پولیس فوراً متحرک ہوجاتی ہے اور جائے وقوعہ پر فوری کارروائی عمل میں لائی جاتی ہے۔
انہوں نے بتایا کہ عوامی شکایات کا اس کی اہمیت کے پیش نظر فوری طور پر ایکشن لیا جاتا ہے یا اسے ریکارڈ کا حصہ بنا کر مناسب وقت پر کارروائی کی جاتی ہے۔