سندھ حکومت اور ٹرانسپورٹرز میں مذاکرات کامیاب ہو گئے جس کے بعد ٹرانسپورٹرز نے احتجاج ختم کرنے کا فیصلہ کر لیا۔
سینئر وزیر شرجیل میمن نے ٹرانسپورٹرز سے ملاقات میں حادثے اور پرُتشدد واقعات پر اظہارتشویش کیا۔ کمشنر ہاؤس کراچی میں ٹرانسپورٹرز کے وفد نے سینئر وزیر شرجیل انعام میمن سےملاقات کی جس میں کمشنرکراچی حسن نقوی، سیکرٹری ٹرانسپورٹ، کراچی پولیس اور دیگر موجود تھے۔
سینئر وزیر شرجیل انعام میمن نے واقعے کے بعد ہونے والے پرتشدد واقعات کی شدیدمذمت کرتے ہوئے کہا کہ سندھ حکومت ٹرانسپورٹرز کے جائز مسائل کو ترجیحی بنیادوں پر حل کرے گی، انسانی جان کاضیاع ناقابلِ تلافی ہے اوریہ ہمارے لیے انتہائی افسوسناک ہے۔
https://urdu.arynews.tv/dumper-accident-rashid-minhas-road-dowry/
شرجیل میمن نے کہا کہ تشدد اور توڑ پھوڑ مسائل کا حل نہیں تمام فریقین کیساتھ مل کر ٹرانسپورٹ سیکٹر کےمسائل حل کریں گے اس بات کو یقینی بنایا جائے گا کہ آئندہ ایسے واقعات رونما نہ ہوں جنہوں نےقانون ہاتھ میں لیا، فسادات کو ہوا دی ان پر انسداد دہشتگردی کےمقدمات ہوں گے۔
ان کا کہنا تھا کہ ڈمپر مالکان ڈمپرز میں کیمرا، ٹریکر کیساتھ انشورنس اور ڈرائیورز کا لائسنس یقینی بنائیں گے ٹرانسپورٹرز کے نقصان کے تعین کے لئے کمیٹی تشکیل دے رہے ہیں۔
راشد منہاس روڈ پر ٹریفک حادثے میں جاں بحق افراد کے چچا ذاکر نے میڈیا سے گفتگو میں بتایا کہ ان کا بھائی شاکر (جاں بحق بچوں کا باپ) جناح اسپتال میں ایڈمٹ ہے، اور ان کے دماغ میں شدید چوٹیں آئی ہیں، وہ کپڑے کا کام کرتے ہیں۔
چچا ذاکر کے مطابق متاثرہ فیملی ملیر سے واپس گھر جا رہی تھی کہ حادثہ پیش آیا، اور جاں بحق ماہ نور کی اگلے ماہ شادی تھی، ہم بچی کا جہیز جمع کر رہے تھے، لوگ صبر کا کہتے ہیں کہاں سے لائیں صبر، کیسے کریں صبر۔