کراچی(13 اگست 2025): سائیٹ ایریا حبیب بینک چورنگی میں پولیس مقابلے میں ہلاک ملزم احسن کا کریمنل ریکارڈ سامنے آگیا ہے۔
تفصیلات کے مطابق ڈی آئی جی ساؤتھ اسد رضا نے سائیٹ ایریا حبیب بینک چورنگی میں پولیس مقابلے میں ہلاک ہونیوالے ملزم احسن رضا سے متلعق بتایا کہ وہ پہلے بھی دو بار گرفتار ہوچکا ہے۔
ڈی آئی جی ساؤتھ کے مطابق ملزمان شہری زاہد کے ساتھ واردات کررہے تھے، پولیس جائے واردات پر پہنچی تو ملزمان نے دیکھتے ہی فائرنگ کردی۔
ڈی آئی جی ساؤتھ اسد رضا نے بتایا کہ پولیس کی جوابی فائرنگ سے احسن رضا موقع پر ہی ہلاک ہوگیا، ملزم کا ساتھی موٹرسائیکل پر فرار ہوگیا جبکہ ہلاک ملزم سے اسلحہ، موبائل برآمد ہوا۔
دوسری جانب شہر قائد میں عزیز آباد پولیس نے عائشہ منزل فلائی اوور پر کارروائی کی اس دوران مبینہ مقابلے میں ایک ڈاکو ہلاک ہوگیا جبکہ اس کا ساتھی فرار ہونے میں کامیاب ہو گیا۔
چھیپا ذرائع کے مطابق واقعہ عزیزآباد تھانے کی حدود میں عائشہ منزل فلائی اوور پر پیش آیا، جہاں پولیس نے مشکوک موٹرسائیکل سواروں کو رکنے کا اشارہ کیا، تاہم انہوں نے فائرنگ کر دی۔ جوابی کارروائی میں ایک ڈاکو مارا گیا جبکہ دوسرا موقع سے فرار ہو گیا۔
پولیس حکام کا کہنا ہے کہ ہلاک ڈاکو کی لاش عباسی شہید اسپتال منتقل کر دی گئی، جہاں اس کی شناخت محمد راجا کے نام سے کی گئی۔