راولپنڈی : آذربائیجان کے نائب وزیر دفاع نے فیلڈ مارشل عاصم منیر کو اعلیٰ "پیٹریاٹک وار میڈل” سے نوازا، میڈل صدر الہام علییف کی جانب سے دیا گیا۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کی جانب سے بیان میں کہا گیا کہ فیلڈ مارشل سید عاصم منیر سے آذربائیجان کے نائب وزیردفاع کرنل جنرل کریم والیئف نے جی ایچ کیو میں ملاقات کی، جس میں باہمی دلچسپی کے امور، عالمی و علاقائی سیکیورٹی صورتحال اور دفاعی تعاون پر تبادلہ خیال کیا گیا۔
آئی ایس پی آر کا کہنا تھا کہ آرمی چیف نے آذربائیجان کے ساتھ مثالی تعلقات کو مزید مستحکم کرنے کے عزم کا اظہار کیا اور آذربائیجان و آرمینیا کے تنازع کے پُرامن حل پر مبارکباد دی۔
آذربائیجان کے نائب وزیردفاع نے پاکستان کی مسلح افواج کی پیشہ ورانہ صلاحیتوں، معرکہ حق اور آپریشن بنیان مرصوص کی کامیابی کو سراہا۔
ملاقات میں دونوں ممالک نے دفاعی تعاون اور علاقائی امن و استحکام کے فروغ کے لیے مشترکہ کوششوں پر اتفاق کیا۔
کرنل جنرل کریم والیئف نے آرمی چیف کو آذربائیجان کا اعلیٰ "پیٹریاٹک وار میڈل” پیش کیا، جو صدر الہام علییف کی جانب سے فوجی تعاون کے شعبے میں غیرمعمولی خدمات کے اعتراف میں دیا گیا۔
اس موقع پر کرنل جنرل کریم والیئف نے دہشت گردی کے خلاف پاکستان کی قربانیوں اور کردار کو خراجِ تحسین پیش کیا۔
جی ایچ کیو آمد پر کرنل جنرل کریم والیئف کوجی ایچ کیو آمد پر پاک فوج کے چاق و چوبند دستے نے گارڈ آف آنر پیش کیا۔