بیجنگ (15 اگست 2025): چین نے سائنس، ٹیکنالوجی، انجینئرنگ اور ریاضی میں دلچسپی رکھنے والے پاکستانیوں اور دیگر غیر ملکی نوجوانوں کیلیے نئی ویزا کیٹیگری متعارف کروا دی۔
ایشیا نیوز نیٹ ورک کی رپورٹ کے مطابق چین نے اعلان کیا کہ اس نے سائنس اور ٹکنالوجی میں غیر ملکی ہنرمند نوجوانوں کیلیے ویزا کی ایک نئی قسم ’کے ویزا‘ (K Visa) شامل کر لی۔
ویزا اور امیگریشن سے متعلق خبریں
وزیر اعظم لی کیانگ نے غیر ملکی نوجوان کے داخلے اور اخراج کے انتظام سے متعلق ضوابط میں ترمیم کرنے والے فیصلے کو جاری کرنے کیلیے اسٹیٹ کونسل کے حکم نامے پر دستخط کیے۔
کے ویزا عام ویزا کیٹیگری میں ایک نیا اضافہ ہے جس کے قوانین یکم اکتوبر 2025 سے نافذ العمل ہوں گے۔ اسے وزارت انصاف، وزارت خارجہ، وزارت پبلک سکیورٹی اور نیشنل امیگریشن ایڈمنسٹریشن نے مشترکہ طور پر تیار کیا ہے۔
اس کیٹیگری کیلیے درخواست دہندگان کو سائنس، ٹیکنالوجی، انجینئرنگ اور ریاضی کے شعبوں میں پیشہ ور ہونا چاہیے۔ یہ ایسے نوجوان کیلیے ہے جنہوں نے نامور یونیورسٹیوں یا تحقیقی اداروں سے بیچلر یا اس سے اوپر کی ڈگری حاصل کر رکھی ہو۔
کے ویزا رکھنے والوں کو تعلیم، سائنس و ٹیکنالوجی اور ثقافتی تبادلے جیسے شعبوں میں سرگرمیوں میں حصہ لینے کی اجازت ہوگی۔
واضح رہے کہ اس سے قبل چین میں ویزا کی 12 کیٹیگریز تھیں جن میں سیاحت کیلیے ایل ویزا (L Visa)، مستقل رہائش کیلیے ڈی ویزا (D Visa) اور جی ویزا (G Visa) شامل ہیں۔
کے ویزا ہولڈرز کو ملک میں داخلے کی تعداد، معیاد اور قیام کی مدت کے لحاظ سے مزید سہولت ملے گی۔ ان کیلیے اہلیت کا معیار درخواست دہندگان کی عمر، تعلیمی پس منظر اور کام کے تجربے کی بنیاد پر ہوگا۔
کیٹیگری سے متعلق مزید تفصیلات سامنے آنا باقی ہیں۔