واشنگٹن: امریکی صدر ٹرمپ نے پاکستان اور بھارت کے درمیان جنگ میں چھ سے سات طیارے گرائے جانے کا دعویٰ کردیا۔
تفصیلات کے مطابق امریکی صدر ڈونلڈ ٹرمپ نے ایک بار پھر پاکستان اور بھارت کے درمیان ہونے والی جنگ کا ذکر کرتے ہوئے کہا ہے کہ امن بہت اہم ہے، پاکستان اور بھارت کی جانب دیکھیں ، دونوں کے درمیان جنگ بندی کرائی، یہاں تک کہ دونوں ممالک ایٹمی جنگ کے قریب پہنچ گئے تھے۔
امریکی صدر ڈونلڈ ٹرمپ نے ایک بار پھر دعویٰ کیا ہے کہ پاک-بھارت تنازع کے دوران چھ سے سات طیارے مار گرائے گئے تھے۔
میڈیا سے گفتگو میں صدر نے کہا کہ پاک-بھارت تنازع کے دوران چھ سے سات طیارے مار گرائے گئے تھے، وہ ایٹمی جنگ کے لیے تیار تھے، ہم نے یہ مسئلہ حل کیا۔
انھون نے مزید کہا کہ "میں نے گزشتہ چھ ماہ میں چھ جنگیں حل کی ہیں اور مجھے اس پر فخر ہے۔”
یہ بیان ایسے وقت میں آیا ہے جب چند روز قبل بھی صدر ٹرمپ نے کہا تھا کہ امریکہ نے بھارت اور پاکستان کے درمیان جنگ بندی میں کردار ادا کیا۔ تاہم بھارت مسلسل اس مؤقف کو مسترد کرتا آیا ہے۔
دوسری جانب وائٹ ہاؤس کے مطابق امریکی صدر ڈونلڈ ٹرمپ اور روسی صدر ولادیمیر پیوٹن کی ملاقات آج الاسکا میں ہو گی، جس کے بعد دونوں رہنما مشترکہ پریس کانفرنس کریں گے۔ روسی صدر پیوٹن ملاقات کے لیے الاسکا روانہ ہو چکے ہیں۔
امریکی وزیر خارجہ نے امید ظاہر کی ہے کہ اس ملاقات میں روس یوکرین جنگ بندی کے حوالے سے پیش رفت ممکن ہو سکے گی۔